Mbi 500 mijë gjoba në 2024. Nga ndëshkimet për shpejtësi, parakalimet e rripi i sigurimit, te këmbësorët

Shpesh ata janë cilësuar si “pilotët e rrugës” dhe në të njëjtën kohë janë kthyer në burim aksidentesh. Gjatë vitit 2024, në të gjithë vendin Policia Rrugore ka gjobitur rreth 300 mijë shoferë që kanë udhëtuar me shpejtësi tej normave të lejuara, e që rrugën një pjesë e tyre e kanë kthyer edhe në pistë garash.

Shefi i Sektorit të Sigurisë Rrugore, Artur Selimaj rendit një sërë shkeljesh që kryen më së shumti nga drejtuesit e mjeteve.

Parakalimet e gabuara zënë vendin e dytë me vendosjen e gjobave nga policia. Në total janë vendosur 86.654 masa administrative. Grupi i tretë i gjobave për nga sasia e gjobave janë ata shoferë që nuk vendosin rripin e sigurimit gjatë drejtimit të mjetit, me 61 mijë gjoba.

Varësia nga rrjetet sociale për 41 mijë shoferë nuk ndalet kur drejtojnë me njërën dorë makinën e me tjetrën mbajnë celularin. Gjatë vitit 2024, mbi 40 mijë gjoba janë vendosur edhe për drejtuesit e motomjeteve që nuk përdorin kaskën mbrojtëse.

Një tjetër kategori e gjobitur janë edhe këmbësorët dhe çiklistët. Ndaj tyre janë vendosur 2302 masa. Për këtë kategori, Shefi i Sektorit të Sigurisë Rrugore ka një apel, pasi në shumicën e rasteve kanë qenë burim aksidentesh.

Ndërgjegjësim gjatë vitit të kaluar ka pasur për drejtuesit e mjeteve që kanë varësi nga alkooli, apo kanë konsumuar pije alkoolike. Në total janë gjobitur 4795 shoferë të dehur. Ndërsa për kalimin me të kuq të semaforit, janë ndëshkuar 210 shoferë.

Për të gjitha këto shkelje, Policia Rrugore ka vendosur mbi 500 mijë gjoba në të gjithë vendin./A2 CNN