Kërkesa e lartë, shtrenjtohen qiratë në vend

Kërkesa e lartë, zhvillimi i zonave të reja me përmirësimin e infrastrukturës dhe rritja e turizmit kanë bërë që përgjatë vitit të shkuar qiratë të rriten me 3.2% në krahasim me vitin 2023.

Sipas Institutit të Statistikave, ndonëse për 5 muajt e fundit të vitit që lamë pas, norma e indeksit u ul ndjeshëm, duke u regjistruar nën nivelin e 1.6%, kjo rënie nuk pati ndikimin e pritur në uljen e çmimeve të qirave.

Normat më të larta të rritjes mujore të qirave u regjistruan në muajt e parë të vitit, ku nga janari deri në fund të prillit treguesi ka qenë konstant në 4.4% çdo muaj, sipas INSTAT. Nga ana tjetër, muaji i fundit ishte ai me rritjen më të lehtë në 2 vitet e fundit, ku u regjistrua në nivelin e 0.9%.

Një faktor ndikues që është përhapur përgjatë viteve të fundit dhe ka kontribuar në rritjen e çmimeve të qirave është “Airbnb”, ose qiratë ditore.

Rritja e numrit të turistëve, kryesisht gjatë sezonit veror, ndikon drejtpërdrejt në rritjen e kërkesës, duke rritur paralelisht edhe kërkesën nga ana e konsumatorëve.

Ky trend ka sjellë ndryshime të dukshme në tregun e qirave, duke e bërë më sfiduese gjetjen e banesave me qira afatgjata në qytetet kryesore.

Paralel me turizmin ka ndikuar dhe përmirësimi i infrastrukturës. Me zhvillimin e rrugëve zonat bëhen më të aksesueshme duke rritur dhe vlerën e pronës, çka bënë që dhe kërkesa për apartamente me qera të jetë me e lartë.