LIGJET E BIZNESIT
Shqipëria është e varur nga produktet e importit në konsumin e përditshëm ushqimor. Të dhënat e Instituti të Statistikave për tregtinë e jashtme tregojnë se importet shqiptare të produkteve ushqimore gjatë 11-të muajve të vitit 2024 arritën në 96 miliardë lekë. Grupet kryesore të importuara përfshijnë “Përgatitjet prej drithërave“ me një vlerë prej 12 miliardë lekësh, duke përfaqësuar 12.9% të importeve totale për kapitullin e ushqimeve dhe produkteve bujqësore.
Në vendin e dytë renditen “Produktet e peshkut dhe kafshëve guacore” me një total prej 9.42 miliardë lekësh. Ndërkohë, importet e drithërave kapën vlerën e 9.2 miliardë lekësh, duke përbërë 9.8% të totalit. Me një vlerë prej 7.52 miliardë lekësh, grupi “mishi dhe të brendshme” përfaqëson 8.1% të importeve totale si dhe frutat dhe arrat u importuan me një vlerë prej 6.67 mld lekë.
Po ashtu Shqipëria mbështetet tek importet edhe për produkte të përpunuara të frutave dhe zarzavateve, vlera e të cilave arriti në 7.37 miliardë lekë që zënë 7.9% të totalit. Diferenca mes importeve dhe eksporteve për ushqimet ishte -45.54 miliardë lekë, duke pasqyruar varësinë e Shqipërisë nga importet, veçanërisht për “Kafshët e gjalla dhe “Drithërat dhe produktet e përpunuara të frutave/zarzavateve”.
Renditja ndryshon kur flasim për eksportet. Gjatë periudhës janar-nëntor 2024, totali i eksporteve ishte rreth 43.7 miliardë lekë. Produktet kryesore të eksportuara ishin kafshët e gjalla, drithërat, farat vajore, bimët industrial etj. Grupi i parë më i rëndësishëm ishte ai i kafshëve të gjalla me një vlerë totale prej 11.51 miliardë lekësh ose 24.1% të eksporteve totale për kapitullin e ushqimeve.
Në vendin e dytë renditen drithërat me një total prej 6.15 miliardë lekësh. Pas tyre, renditen farat vajore, bimë industrial etj, me vlerë prej 5.09 miliardë lekësh dhe një peshë prej 10.66%. Një tjetër kategori e rëndësishme ishin zarzavatet dhe rrënjët, me eksporte prej 4.6 miliardë lekësh, që përbëjnë 9.7% të totalit.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Pra, shifrat tregojnë se Shqipëria mbështetet në masë të madhe tek importet për produkte ushqimore bazë dhe ato bujqësore. Për të reduktuar varësinë nga importet, është e rëndësishme të nxitet prodhimi vendas, veçanërisht në kategoritë ku potenciali bujqësor është i lartë.
