LIGJET E BIZNESIT
Nga Ervin Resuli, ekspert për sigurinë ushqimore
Jeta na fton të jemi më të ndjeshëm dhe më të përgjegjshëm për të. Sot është momenti të reagojmë për atë që po konsumojmë dhe për mënyrën si po i ushqejmë fëmijët tanë. Nëse nuk veprojmë tani, nesër mund të zgjohemi në pavionet e onkologjikut, duke parë pasojat e neglizhencës sonë dhe të institucioneve që duhet të na mbrojnë.
Vetëm për vitin 2024 kemi parë skandale të pafund për sigurinë ushqimore:
Akulloret me etilen oksid, një substancë kancerogjene që ndot tregun tonë.
Kontrabanda e lopëve me brucelozë nga Greqia, një kërcënim i drejtpërdrejtë për shëndetin e konsumatorit.
ETHEFONI Lejimi i përdorimit të hormoneve të ndaluara në perime , që prek çdo familje shqiptare.
Mandarinat me pesticide kancerogjene, që arrijnë në tryezat tona pa kontroll.
Dështimi i vaksinës kundër brucelozës tek të imtat, duke rrezikuar shëndetin e bagëtive dhe konsumatorëve.
Këto janë vetëm 5 nga rastet më të tmerrshme të këtij viti që janë bërë publike. Për to ka zero reagim nga institucionet, të cilat duhet të mbrojnë jetën tonë!
E gjitha kjo na çon drejt onkologjikut, ku fillon kalvari i vuajtjeve, ndërkohë që mungojnë edhe medikamentet bazike për trajtim.
Ne nuk mund të lejojmë të kthehemi në mbetje biologjike!
Sot është koha të ndërgjegjësohemi, të reagojmë dhe të kërkojmë përgjegjësi. Sepse nesër mund të jetë vonë.
