Nga Aurora Sulce, Producente Ekzekutive për Biznesin në A2 CNN
Dita e Rinisë e gjeti Shqipërinë me më pak të rinj.
Sipas Censit 2023, raporti i varësisë së të rinjve ka zbritur aktualisht në 24% nga 30,4% që ishte në Censin 2011, ndërsa raporti i të moshuarve është rritur në këtë periudhë me 13.7%.
Të dhënat e detajuara tregojnë edhe grupmoshat që kanë pësuar në vite luhatjet më të ndjeshme.
Kur u zhvillua Censi 2011, në të gjithë vendin u numëruan mbi 268 mijë të rinj të grupmoshës 15-19 vjeç, por në Censin 2023 numri i tyre gati u përgjysmua. Kjo grupmoshë ka pasur edhe rënien më të madhe në periudhën ndërmjet censeve, si në numër dhe në përqindje. Kjo tregon qartazi se numri i të rinjve në Shqipëri po bie me shpejtësi dhe shpjegohet me emigracionin e lartë të të rinjve dhe familjeve me fëmijë pas vitit 2016.
Por cilat janë arsyet e largimit të të rinjve nga vendi?
Problemet me tregun e punës, të reflektuara në paga të ulëta dhe kushte jo të përshtatshme pune; kostot e larta të shkollimit, si dhe mungesa e perspektivës vlerësohen faktorët kryesorë të emigrimit të të rinjve.
Dhe ky emigrim i vazhdueshëm dhe i pandalshëm ka kosto të jashtëzakonshme për vendin.
Vlerësohet se për cdo të larguar, dëmi që i shkaktohet ekonomisë përllogaritet në 14.900 euro.
Por pasojat shkojnë edhe më larg.
Ato reflektohen në tregun e punës me mungesë të fuqisë punëtore dhe me ulje të produktivitetit dhe konkurrueshmërisë së ekonomisë.
