Sa kushton korrupsioni? 575 milionë euro u gërryen nga taksat e shqiptarëve

Nga  Aurora Sulce, Producente Ekzekutive për Biznesin në A2 CNN

Teksa kreu i SPAK, Altin Dumani u shpall kampion i antikorrupsionit nga Departamenti Amerikan i Shtetit, korrupsioni mbetet problem për Shqipërinë, me kosto të konsiderueshme për buxhetin e shtetit dhe xhepat e qytetarëve.

Por cfarë është korrupsioni në ekonomi?

Konsiderohet si një dukuri shkatërrimtare, që iu kundërvihet ligjshmërisë dhe parimeve të ekonomisë. Gjithashtu, përkthehet si një taksë e fshehtë për qytetarët dhe bizneset.

Por sa i kushton buxhetit të shtetit dhe qytetarëve shqiptarë korrupsioni?

Qendra studimore Altax ka vlerësuar në një raport se kosto e korrupsionit përllogaritet në rreth 10% të shpenzimeve publike. Në vitin 2022, korrupsioni na ka kushtuar 515 milionë euro, ndërkohë që është rritur në 575 milionë euro vitin e kaluar, paralelisht me rritjen e shpenzimeve që ka bërë qeveria.

Fondi Monetar Ndërkombëtar vlerëson se vendet që mbledhin më shumë të ardhura perceptohen si më pak të korruptuara.

Shqipëria është vendi i parafundit në rajon për mbledhjen e të ardhurave me vetëm 27.2% të Prodhimit të Brendshëm Bruto. Ne lëmë pas vetëm Kosovën, ndërsa vendet me nivelin më të lartë të të ardhurave janë Serbia dhe Mali i Zi.

Por si e ndikon korrupsioni ekonominë?

Sipas një skeme të thjeshtë, një nivel i lartë korrupsioni con në një keqpërdorim të taksave të qytetarëve, duke bërë që fondet publike të mos shkojnë në sektorë bazë, si arsimi dhe shëndetësia, por në duart të caktuara. Rrjedhimisht, buxheti do të ketë gjithmonë nevojë për para dhe kjo do të cojë në rritje të nivelit të taksave, barrë që bizneset do ua shkarkojnë qytetarëve me rritje të cmimeve të produkteve dhe shërbimeve në treg, duke vënë në vështiresi pensionistët dhe konsumatorët.