Rihapet tenderi për portin e ri në Porto Romano, 400 mln euro për fazën e parë të projektit

Autoriteti Portual Durrës ka rihapur tenderin për ndërtimin e portit të ri tregtar në Porto Romano. Fillimisht gara u hap në muajin korrik të këtij viti, por ajo nuk u finalizua me sukses, ndërkohë që fondi limit edhe në procedurën e rishpallur është 39.32 mld lekë apo rreth 400 mln euro. Gara tenderuese është hapur për fazën e parë të projektit që përfshin zhvillimin e një terminali kontejnerësh.

Porti i ri tregtar në Porto Romano do të ndërtohet me fonde të buxhetit të shtetit, dhe jo me financim të huaj sikurse parashikohej në ligjin fillestar të buxhetit 2024. Përmes Aktit Normativ të miratuar në muajin shkurt, për këtë vepër portuale u akorduan 9.88 mld lekë. Po ashtu, u parashikua mbështetje buxhetore me 14.7 mld lekë për vitet buxhetore 2025 dhe 2026.

Ndërtimi tij konsiderohet si një vepër me rëndësi strategjike, që përmbush standardet ndërkombëtare, teknologjikisht të përparuara dhe ekologjike, të cilat do të garantojnë plotësimin e kërkesave të Shqipërisë dhe vendeve të Rajonit sa i takon transportit detar.

Qeveria ka deklaruar se Porti i ri në Porto Romano do të krijojë një hapësirë logjistike, që do të shërbejë si qendër për rritjen e mëtejshme ekonomike për zonën Tiranë – Durrës dhe trajtimin e ngarkesave tranzit në port dhe se do ta vendosë Shqipërinë si nyje në rrjetet infrastrukturore rajonale, duke sjellë rritje dhe përmirësime në aspektin e zhvillimit ekonomik e social të vendit./Tv Scan