Pse siguria kibernetike është gurthemeli i suksesit për bizneset e çdolloji?

Qoftë një startup që hedh hapat e para, një SMB(Small and Midsize Business) që synon rritjen, apo një kompani që kërkon të ruajë suksesin e saj afatgjatë, rrugëtimi i ndërtimit të një biznesi është gjithmonë emocionues. Por, pavarësisht madhësisë apo fazës ku ndodhet një biznes, një sfidë gjithmonë mbetet e madhe: siguria kibernetike.

Çdo klikim, transaksion apo e dhënë sjell mundësi të reja për dobësi të sigurisë, dhe rritja e krimit kibernetik — që është rritur me 600% që nga viti 2020 — ka rritur ndjeshëm këto rreziqe. Për më tepër, sulmuesit modernë nuk bëjnë dallime; ata janë oportunistë, duke kërkuar përfitimin maksimal me përpjekje minimale.

Ajo që dikur konsiderohej si një çështje e IT-së, tani është bërë një çështje mbijetese për biznesin. Si pasojë, siguria kibernetike nuk është më një pyetje nëse një biznes do të përballet me kërcënime, por kur.

Hedhja e themeleve për një startup

Nisja e një startup-i është padyshim një rrugëtim emocionues. Sipërmarrësit shpesh përballen me shumë detyra, si sigurimi i financimit, tërheqja e klientëve dhe ndërtimi i një ekipi të talentuar. Mes gjithë kësaj, një aspekt kritik shpesh neglizhohet: siguria.

Kriminelët kibernetikë shpesh i shohin startup-et si objektiva të lehta. Me ekipe më të vogla dhe burime të kufizuara, ato shpesh nuk kanë protokollet e forta të sigurisë që ndërmarrjet më të mëdha zakonisht kanë. Rreth 43% e sulmeve kibernetike janë të drejtuara ndaj bizneseve të vogla, ndërsa vetëm 14% prej tyre janë të përgatitura për t’u mbrojtur. Por madhësia e vogël e një startup-i mund të kthehet në avantazh. Me një ekip të vogël, është më e lehtë të krijohet një kulturë sigurie që nga fillimi.

Si mund të krijojnë startup-et një bazë të fortë sigurie pa shpenzuar shumë?

• Trajnimi i punonjësve: Punonjësit janë linja e parë e mbrojtjes. Trajnimi i tyre për praktikat më të mira të sigurisë ndihmon në krijimin e një mjedisi të vetëdijshëm dhe reagues ndaj kërcënimeve.
• Mbrojtja e fjalëkalimeve: Ndërsa fjalëkalimet janë të rëndësishme, mbështetja vetëm tek ato mund të jetë e rrezikshme. Përdorimi i Autentifikimit me Shumë Faktorë (MFA) dhe teknologjive biometrike mund të përforcojë mbrojtjen.
• Backup dhe encryption: Rezervimi i të dhënave offline dhe enkriptimi i informacionit të ndjeshëm janë gjithashtu të domosdoshme.
• Plani i Reagimit ndaj Incidenteve: Edhe pa një ekip të dedikuar sigurie, një plan bazë i reagimit ndaj incidenteve është i domosdoshëm për t’u përballur me sfidat.

Rritja e sigurt për startup-et në shkallëzim

Kur një startup fillon të shkallëzohet, një nga pyetjet kryesore është: “Kur është koha e duhur për të punësuar një CISO(chief information security officer)” Gjatë kësaj faze, siguria bëhet kritike për të ndërtuar besimin me klientët dhe për të siguruar që produkti shihet si i sigurt dhe i besueshëm. Një CISO mund të ndihmojë gjithashtu në përmbushjen e rregulloreve dhe certifikimeve të rëndësishme.

Rritja sjell me vete më shumë përdorues, pajisje dhe punonjës që kërkojnë menaxhim të kujdesshëm. Këtu hyn në lojë një Zgjidhje e Menaxhimit të Unifikuar të Pajisjeve (UEM). Një qasje e tillë unifikon administrimin dhe sigurinë e pajisjeve nga një panel i vetëm, duke lehtësuar administrimin e IT-së dhe duke përmirësuar sigurinë.

Një tjetër prioritet është Menaxhimi i Identitetit dhe Qasjes (IAM). Ky sistem siguron që çdo person të ketë qasje vetëm në atë që i nevojitet, në kohën e duhur dhe nga pajisjet e duhura. Gjithashtu, ky është momenti ideal për të adoptuar një arkitekturë Zero Trust (ZTA). Në një model pune hibrid, mbrojtja e kufijve të rrjetit nuk mjafton më. ZTA nënvizon rëndësinë e ndërtimit të besimit në çdo ndërveprim, duke siguruar një nivel më të lartë mbrojtjeje. siguria kibernetike

Sigurimi i së ardhmes për bizneset e mëdha

Kompanitë e mëdha përballen me sfida të vazhdueshme nga sulmet e sofistikuara, ku më të zakonshmet janë ransomware dhe shkeljet e të dhënave. Pavarësisht se kanë ekipe të dedikuara për siguri, ngarkesa e madhe e informacionit mund të çojë në neglizhimin e paralajmërimeve kritike.

Këtu hyjnë në lojë XDR (Extended Detection and Response) dhe SIEM (Security Information and Event Management). Kombinimi i këtyre mjeteve ndihmon në zbulimin dhe analizimin e sjelljeve të dyshimta në kohë reale. Investimi në një Qendër të Operacioneve të Sigurisë (SOC) gjithashtu ndihmon në monitorimin dhe menaxhimin e peizazhit të kërcënimeve në mënyrë proaktive.

Në fund, siguria nuk është vetëm për të parandaluar sulmet, por edhe për të ndërtuar rezistencë. Duke kaluar nga një qasje reaktive në një strategji proaktive, bizneset mund të mbrojnë pasuritë e tyre dhe të sigurojnë të ardhmen./ entrepreneur