Profili i profesioneve në Shqipëri/ Punët më të përhapura: Shitës, kamerier, administrator dhe punëtor krahu

Një në shtatë shqiptarë që marrin rrogë mujore punojnë si shitës, kamerier, administrator ose punëtor krahu. Në total janë 102 mijë të punësuar në këto profesione e zanate. Lista kryesohet nga shitësit në dyqane, me mbi 39 mijë të tillë, ndjekur nga administratorët në sipërmarrje private, me gati 22 400 të punësuar. Kryesisht, në biznesin më popullor në vend, atë të kafeneve, punojnë gati 14 mijë kamerierë, ndërsa numri i punëtorëve të krahut dhe atyre ndihmës përllogaritet në gati 27 mijë.

Të dhënat nga Drejtoria e Përgjithshme e Tatimeve tregojnë ndërkohë se profesionet më pak të përhapura në vend janë artist imitues, asistent shëndetësor i komunitetit, bakteriolog për produktet ushqimore, bashkues tubash dhe dirigjent për grupe vokali.

Këto profile profesionesh, tregues i një ekonomie të bazuar te bizneset e shërbimeve, për përfaqësues nga ky sektor lidhen me strukturën e financiare të Shqipërisë.

Të dhënat nga Instituti i Statistikave tregojnë se gati 87% e bizneseve në vend janë të përqendruara në tregti, shërbim ushqimor, akomodim, transport dhe komunikacion.