LIGJET E BIZNESIT
Një pjesë e mirë e profesionistëve të lirë nuk kanë deklaruar në kohë të dhënat e llogarive bankare, duke vështirësuar procesin e rimbursimit të kësteve të parapaguara të tatimfitimit.
Administrata Tatimore bën me dije se pas verifikimit të të dhënave të tatimpaguesve, që ofrojnë shërbime profesionale, në zbatim të Aktit Normativ nr. 4, datë 27.11.2024, “Për një shtesë në ligjin nr.29/2023, “Për Tatimin mbi të Ardhurat”, të ndryshuar, konstatohet se një pjesë e tyre nuk kanë deklaruar ende në e-Filing të dhënat e llogarive bankare.
Ky informacion është i domosdoshëm për të finalizuar me sukses procesin e kthimit të pagesave të kësteve paraprake të Tatimit mbi Fitimin e Thjeshtuar apo Tatimin mbi Fitimin brenda këtij viti.
Për këtë arsye, Drejtoria e Përgjithshme e Tatimeve, ka vendosur të shtyhet afati për deklarimin e llogarive bankare, në llogarinë e tyre elektronike e-Filing deri më datën18 dhjetor 2024.
Në të kundërt, pra nëse përditësimi i llogarive bankare nuk bëhet brenda këtij afati, Administrata Tatimore nuk garanton rimbursimin e pagesës së tatimit të parapaguar brenda këtij viti, por në një moment të dytë gjatë vitit 2025.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Tatimpaguesit duhet të kenë llogari bankare në monedhën Lek dhe aktive në një nga bankat e nivelit të dytë.
Në fund të Nëntorit, Këshilli i Ministrave miratoi aktin normativ për kthimin e kësteve të tatim fitimit të parapaguar nga profesionistët e lirë. Nga akti normativ përfitojnë rreth 6450 tatimpagues, të cilët do të rimbursohen me një fond prej 501 milionë lekësh.
Ligjit për tatimin mbi të ardhurat i cili hyri në fuqi më 1 Janar 2024, tatonte afro 29 mijë profesionistë të lirë me një normë nga 15-23 %. Profesionistët nuk ishin dakord me këtë regjim tatimor dhe e çuan çështjen në Gjykatën Kushtetuese. Pas disa seancash, Gjykata Kushtetuese vendosi të shfuqizojë nenin që tatonte këtë shtresë, duke e cilësuar si diskriminues./TV Scan
