Nis shpërndarja e bonusit të fundvitit për pensionistët

Këtë të hënë ka nisur shpërndarja e bonusit të fundvitit për pensionistët. Lajmin e ka bërë të ditur Ministri i Ekonomisë, Blendi Gonxhe përmes një postimi në rrjetin social Facebook, ku shkruan se deri në orën 10:00 janë shpërndarë 19,566 bonuse.

Në vetëm dy orë janë tërhequr 13,712 bonuse 15,000 lekë për pensionet nën 20,000 lekë, invalidët dhe pensionet familjare. E po ashtu janë tërhequr edhe 5,854 bonuse 10,000 lekë për pensionet mbi 20,000 lekë.

Bonusi i fundvitit mund të tërhiqet në çdo pikë të Postës Shqiptare ose pranë çdo banke të nivelit të dytë dhe qeveria ka përcaktuar si afat përfundimtar, datën 30 qershor 2025.

Kujtojmë se shpërblimin e fundvitit do ta përfitojnë 724 mijë pensionistë, nga të cilët 511 mijë do të marrin 15 mijë lekë shpërblim pasi kanë pension mujor nën 20 mijë lekë dhe pjesa tjetër, prej 213 mijë do të marrin 10 mijë lekë bonus pasi kanë pension mbi 20 mijë lekë.

Fatura e bonusit të fundvitit është përllogaritur 9.8 miliardë lekë, ku 3.6 miliardë lekë ishin të planifikuara në buxhet, 2.4 miliardë lekë janë të mbartura nga indeksimi më i ulët se vjet dhe mbi 3.7 miliardë lekë merren nga buxheti i shtetit dhe buxheti i planifikuar për sigurimet shoqërore për vitin 2024.