Bonusi i fundvitit sipas masës së pensionit, ja cilët përfitojnë

Nga Aurora Sulce, Producente Ekzekutive për Biznesin në A2 CNN

Qeveria ka rishikuar buxhetin, duke shpërndarë një pjesë të të ardhurave të krijuara si suficit tek shtresat më vulnerabël. Paralelisht është përcaktuar edhe masa e bonusit që do të marrin në pranverë pensionistët.

Përveç bonusit të fundvitit, të shpërndarë tashmë, të moshuarit që marrin pension deri në 20 mijë lekë, do të marrin 10 mijë lekë shtesë në pranverë. Kush merr më shumë se 20 mijë lekë pension, do të përfitojë edhe 5 mijë lekë të tjera si bonus.

Nga rishikimi i fundit që iu bë buxhetit, i treti për këtë vit, qeveria do të japë ndihmë financiare edhe për shtresat vulnerabël.

🎙️ Podcast “Money Hour” | Fast News Economy

🏛️ LIGJET E BIZNESIT–Ligji në Kohë Reale për Biznesin Modern

Një bonus prej 15 mijë lekësh do të shkojë për familjet me ndihmë ekonomike, personat me aftësi të kufizuar dhe kujdestarët e tyre. Në total, fondi për këtë kategori arrin në 2.2 miliardë lekë. Ndërkohë që një fond shtesë prej 1.4 miliardë lekë do të jepet edhe për fermerët, si dhe 1.6 miliardë lekë për të mbështetur bashkitë për shlyerjen e detyrimeve të prapambetura, si dhe në përmirësimin e ofrimit të shërbimeve për qytetarët.

Por sa të mjaftueshme janë këto fonde për të përballuar rritjen e çmimeve? Kjo duke pasur parasysh se për shtresat vulnerabël, si pensionistët apo familjet me të ardhura të ulëta, shpenzimet për ushqime zënë mbi 60% të buxhetit mujor.

Të dhënat tregojnë se rritja e çmimeve tek produktet ushqimore në vitin e fundit ka qenë thuajse dyfish më e lartë se inflacioni i përgjithshëm. Kështu, në nëntor, që është edhe statistika e fundit zyrtare, inflacioni i produkteve ushqimore ishte 3.2% nga 2% që ishte inflacioni i përgjithshëm.