Viti “i artë” i bankave, vetëm nga interesat siguruan 700 milionë euro

Ky vit po rezulton “i artë” për sistemin bankar, ku vetëm nga interesat u mblodhën rreth 70 miliardë lekë ose rreth 700 milionë euro. Të dhënat e Bankës së Shqipërisë tregojnë se shifra që I përket 9-mujorit është gati 10 miliardë lekë më shumë se vitin e kaluar. Të ardhurat bruto të siguruara nga interesat kanë pësuar një rritje drastike me 51% në krahasim me tremujorin e dytë.

Për sa i përket fitimit neto të bankave nga interesat, ai rezulton në 56 miliardë lekë, rreth 10.4% më i lartë se në të njëjtën periudhë të vitit të kaluar.

Pavarësisht këtij bilanci afatshkurtër pozitiv, në krahasim me fundin e 2023-it, të ardhurat bruto dhe neto nga interesat e kredive, të investimeve në tituj qeveritarë, si bono thesari dhe obligacione, por edhe nga interesat e mbledhura në forma të tjera, janë tepër të ulëta.

Dhjetori i vitit të kaluar shënoi rekord për sa i përket fitimeve të bankave nga interesat, ku konkretisht u mblodhën 83 miliardë lekë bruto. Megjithatë, duke parë trendin aktual, deri në fund të vitit pritet që të tejkalohet shuma e interesave të mbledhura në 2023-in.

Në krahasim me të ardhurat e siguruara nga interesat, mund të thuhet se të ardhurat e mbledhura jo nga interesat janë në një shumë më të vogël. Sipas statistikave të publikuara nga Banka Qendrore, rreth 16 miliardë lekë ishte fitimi i bankave jo nga interesat.

Nga ana tjetër, shpenzimet për interesa kanë qenë shumëfish më të larta se periudha korrik-shtator 2023. Konkretisht, shpenzimet e realizuara për t’i paguar qytetarëve interesat e depozitave të tyre, por jo vetëm, arritën në 14 miliardë lekë në tremujorin e tretë, duke regjistruar kështu një rritje me thuajse 43%.