Shteti nuk paguan kontraktorët, rriten detyrimet e prapambetura

Pushteti qendror dhe ai vendor ka thelluar borxhet ndaj kompanive kontraktore. Të dhënat e Ministrisë së Financave tregojnë se stoku i detyrimeve të prapambetura arriti në shtator të këtij viti në 10.5 miliardë lekë apo rreth 105 milionë euro, me një rritje prej 600 milionë lekësh kundrejt qershorit. Ndërsa kundrejt fundvitit të kaluar, rritja e detyrimeve ka qenë rreth 2.7 miliardë lekë.

Në totalin e kësaj shume, qeveria qendrore zë 7 miliardë, ndërsa pushteti vendor 3.5 miliardë lekë. Ajo që vihet re është se qeveria qendrore ka rritur stokun me 1.3 miliardë lekë, pushteti lokal ka bërë kthesë, duke ulur stokun me rreth 0.7 miliardë lekë në raport me qershorin 2024.

Sa i takon kategorisë së detyrimeve të prapambeturave, peshën më të madhe e zënë ato për investime publike, duke qenë se përgjatë këtij viti ka pasur një numër të lartë kantieresh të hapura, për të ofruar shërbime më të mira për qytetarët.

Konkretisht, detyrimet për investime, arrijnë vlerën e rreth 5 miliardë lekëve, ku stoku më i lartë sërish regjistrohet në pushtetin qendror.

Nga ana tjetër, stoku i detyrimeve për vendime gjyqësore për largime të padrejta nga puna apo ankimime të bizneseve. Qeveria qendrore dhe ajo vendore, regjistrojnë një vlerë prej rreth 2.4 miliardë lekësh, nga 1.6 miliardë lekë që regjistrohej në fund të viti të kaluar.  Peshën më të madhe e zë pushteti qendror.

Kategoria “të tjera” zë afro 1,4 miliardë lekë të totalit të detyrimeve.