Shqipëria është në miljet e fundit në rrugën drejt anëtarësimit në Bashkimin Evropian dhe sistemi bankar mund t’i japë një tjetër hov këtij procesi. Para se të trokasë në dyert e Bashkimit Europian, Shqipëria duhet të jetë gati. Për një “po” në vend të një “jo”-je, vendi duhet fillimisht të integrohet institucionalisht dhe ekonomikisht.
“Procesi i integrimit ofron sfida dhe oportunitete po aq serioze për sektorin tonë bankar. Lëvizja e lirë e kapitalit nënkupton dhe një ekspozim të plotë ndaj konkurrencës midis këtij sektori dhe atij evropian. Industria jonë bankare duhet të ndërgjegjësohet për pasojat që kjo konkurrencë do të ketë në modelin e biznesit dhe marzhet e fitimit, duke marrë në kohë masat për përballimin e saj”, tha Gent Sejko, guvernator i Bankës së Shqipërisë.
“Mundësitë e kushtëzuar nga sfidat” në rrugën e vështirë të anëtarësimit në “union” me objektiv ambicioz vitin 2030 pranohen edhe nga përfaqësuesit më të lartë të politikës negociuese dhe financave të vendit.
“Roli ynë është ai i “gjuetarit të mundësive”. Ne duhet të krijojmë mundësi dhe përfitime praktike, reale, për qytetarët dhe bizneset tona. Ky është rasti me SEPA, zonën unike të pagesave në Euro, përfitimet e të cilës drejtpërdrejt për qytetarët dhe bizneset janë domethënëse”, tha Majlinda Dhuka, ministre e Shtetit dhe Kryenegociator.
“Integrimi evropian na ve përpara një sërë detyrash që ne duhet t’iu përqasemi me standarde të caktuara. Për këtë bashkëpunimi ndërinstitucional është shumë i rëndësishëm veçanërisht në drejtim të digjitalizimit.”, tha Petrit Malaj, ministër i Financave.
Me rrugën ende të gjatë para drejt anëtarësimit, theksi vihet veçanërisht te individi si kapitali më i çmuar i Shqipërisë.
“Ndërkohë që duhet të nxisim medoemos rritjen ekonomike përmes transformimit dhe modernizimit të ekonomisë, përmes rritjes së kapitalit njerëzor, përmes rritjes së produktivitetit”, u shpreh Eduard Shalsi, kryetari i Komisionit të Ekonomisë dhe Financave.
Me qëllim nxitjen e bashkëpunimit mes institucioneve, Banka Qendrore në bashkëpunim me Shoqatën Shqiptare të Bankave zhvilluan konferencën vjetore “Roli i bankës qendrore dhe sistemit bankar në rrugën drejt BE-së”. Në të morën pjesë përfaqësues të trupit diplomatik në Tiranë si dhe zyrtarë nga Fondi Monetar Ndërkombëtar, Banka Botërore dhe ajo për Rindërtim dhe Zhvillim.
