Papunësia ka zbritur në 10.2% këtë vit, sipas të dhënave zyrtare që bëhen të ditura në realcionin që shoqëron buxhetin 2025. Kundrejt vitit të kaluar, niveli i këtij treguesi ka zbritur me 1%, ndërsa në pesë vitet e fundit, papunësia është tkurrur me 2%.
Papunësia në Shqipëri rezulton ndër më të ulëtat në rajon, ndërkohë që më mirë pozicionohet Serbia me një nivel papunësie prej 9.3%.
“Në tremujorin e parë të vitit 2024, shkalla e papunësisë ra në shumicën e ekonomive të rajonit, krahasuar me të njëjtën periudhë të një viti më parë. Në përputhje me përshpejtimin e aktivitetit ekonomik, punësimi mesatar vjetor në Ballkanin Perendimor u rrit ndjeshëm në 2.5%, ndërkohë që edhe pjesëmarrja e fuqisë punëtore pati rritje. Në përgjithësi, normat e papunësisë në rajon mbetën në nivelet më të ulëta historike, por krahasimisht më të larta me vëndet e BE-së, duke filluar nga 9.4% në Serbi, në 13.5% në Bosnjë dhe Hercegovinë”, theksohet në relacion.
Por cila është asryeja kryesore që ka shkaktuar uljen e papunësisë në Shqipëri, por jo vetëm? Përvec rritjes ekonomike, faktori kryesor vlerësohet se është niveli i lartë i emigrimit. Sipas cendit 2023, popullsia e Shqipërisë ka zbritur në 2.4 milionë banorë, me rënie 420 mijë kundrejt dhjetë viteve më parë. Duke pasur më pak qytetarë, niveli i papunësisë bie automatikisht. Ndaj dhe suksesi në luftën kundër papunësisë duhet marrë me rezerva.
