Ndërhyrja e BSH-së, kur do të bëhen të lira kreditë?

Nga Aurora Sulce, Producente Ekzekutive për Biznesin në A2 CNN

Banka e Shqipërisë uli për herë të dytë këtë vit koston e lekut, në përpjekje për të stimuluar kreditimin dhe ekonominë, pasi rreziku i inflacionit, ose thënë ndryshe rritjes së çmimeve duket se ka kaluar.

Norma bazë e interesit për lekun ka zbritur aktualisht në 2.75%, duke u rikthyer në nivelet e nëntorit të vitit 2022. E një vendim i tillë padyshim që do të reflektohet në ekonomi.

Ajo që pritet është një ulje e normave të interesit për kreditë e reja në lek, ulje e interesave të depozitave në monedhën vendase dhe e letrave me vlerë të qeverisë: bonove të thesarit dhe obligacioneve. Madje, tek këto të fundit reflektohet fillimisht ulja e normës bazë të interesit.

Por sa janë aktualisht interesat në sistemin bankar?

Ulja e normës bazë do të reflektohet automatikisht në interesat e kredive ekzistuese, përveçse në interesat që bankat ofrojnë për kreditë e reja. Aktualisht, norma mesatare e interesit të të gjithë portofolit të kredisë qëndron në nivelin 4.56%. Ndërkohë që normat e interesit të depozitave të reja në lekë kanë pësuar një rënie të lehtë që nga muaji korrik dhe kanë zbritur aktualisht në 1.94%.

Ulja e normave bazë të interesit është një politikë që ka nisur të ndërmerret tashmë prej muajsh edhe në vendet tjera, pasi duket se bota e ka kapërcyer krizën e inflacionit.

Rezervat Federale në Shtetet e Bashkuara të Amerikës ulën në shtator në 4.8% normën e interesit për dollarin, ndërsa Banka Qendrore e Europiane vetëm pak kohë më parë vendosi të ulë në 3.5% normën bazë të interesit për euron.