Shqiptarët udhëtojnë më shumë për qejf dhe më pak për biznes. Të dhënat e fundit të Institutit të Statistikave konstatojnë se në vitin 2023, numri i udhëtimeve për qëllime personale apo biznesi (brenda apo jashtë Shqipërisë), të kryera nga individët banues në Shqipëri të moshës mbi 15 vjeç ishte 4.399.859. Ky tregues është 17,4 % më i lartë se në vitin 2022.
“Udhëtimet për qëllime personale përbëjnë 97,5 % të udhëtimeve gjithsej, ndërsa udhëtimet për qëllime biznesi 2.5 % të tyre. Përqëndrimet më të larta të udhëtimeve të kryera janë regjistruar në muajt: gusht 14.9 %; dhjetor 11.9 %; korrik 11.5 % dhe qershor 10.4 %”, theksohet në raportin e INSTAT.
Nëse do të analizojmë disa karakteristika kryesore të udhëtimeve, përqëndrimin më të lartë në Shqipëri e shënojnë udhëtimet për qëllime personale (3.4 milion) dhe jashtë vendit ato për qëllime biznesi (60 mijë).
Pushime dhe kohë e lirë” përbën qëllimin më kryesor të udhëtimeve të kryera si në Shqipëri (49,4%) ashtu dhe jashtë saj (47,2%). Udhëtimet e kryera jashtë Shqipërisë për qëllime “Vizita te të afërm dhe miq”, kanë shënuar rritjen më të lartë me rreth 5,1 pikë përqindje, krahasuar me vitin 2022.
Në vitin 2023, përqindjet më të larta të udhëtimeve, brenda (22,9%) dhe jashtë Shqipërisë (30,4%), janë kryer nga grup-mosha 25-34 vjeç. Numri mesatar i netëve të qëndrimit për udhëtime të kryera është 4,14 netë. Vlerat më të larta të shumës së netëve të qëndrimit (në milion) janë regjistruar në muajt gusht, korrik, janar dhe qershor.
Udhëtimet sipas qëllimit
Karakteristikë e këtij viti është rritja më e lartë vjetore e shënuar për udhëtimet për qëllime personale (30,6%) dhe biznesi jashtë Shqipërisë (53,6%).
Në 2023, udhëtimet e kryera brenda dhe jashtë Shqipërisë për “Pushime dhe kohë e lirë” zënë peshën më të madhe, ndjekur nga udhëtimet e kryera jashtë Shqipërisë për qëllime “Vizita te të afërm dhe miq”.
Nëse do të analizojmë më në detaj kohëzgjatjen e udhëtimeve sipas qëllimit në Shqipëri dhe jashtë saj, vërejmë se udhëtimet për “Pushime dhe kohë të lirë” kanë kohëzgjatje të shkurtër, brenda dhe jashtë vendit, përkatësisht me (58,3 %) dhe (60,7 %). Udhëtimet për “Vizita te të afërm dhe miq” kanë kohëzgjatje të shkurtër brenda vendit (90,7 %) dhe kohëzgjatje të gjatë jashtë vendit (86,3%). Udhëtimet e kryera për qëllime biznesi kanë kohëzgjatje të shkurtër, në Shqipëri (79,3 %) dhe të gjatë jashtë saj (64,0 %).
Udhëtimet sipas destinacioneve
Në vitin 2023, destinacionet më të preferuara për udhëtime për qëllime personale apo biznesi në Shqipëri janë qarqet: Tiranë (18,2 %), Vlorë (14,5 %), Korçë (11,7 %) dhe Durrës (9,7 %). Në udhëtimet e kryera jashtë Shqipërie përqindjet më larta janë regjistruar në: Greqi (7,7 %), Itali (6,3 %) dhe shtete të tjera (Spanjë, Angli, etj.) (2,4 %).
Shpërndarja e udhëtimeve, sipas llojit të akomodimit
Lloji më i shpeshtë i akomodimit në vitin 2023, është “të qëndruarit tek të afërmit ose miqtë”, ndjekur nga kategoria “hotel” dhe “ambiente akomodimi me qira” apo “shtëpi ose apartamente të dyta për pushime”. Në vitin 2023, vërehet një rritje për përdorimin e formave alternative të akomodimit (si kamping, llixha dhe shtëpi pushimi), krahasuar me vitin 2022.
Udhëtimet sipas llojit të transportit
Rreth 3,88 milionë udhëtime janë kryer nëpërmjet transportit rrugor të cilët përbëjnë 88,1 % të të gjithë udhëtimeve të kryera në vitin 2023. Rritja më e lartë është regjistruar në transportin rrugor me 1,8 pikë përqindje.
