Nga Aurora Sulce, Producente Ekzekutive për Biznesin në A2 CNN
Prodhimi vendas ka marrë një goditje të fortë, ndërkohë që tregjet po mbushen me mallra importi. Teksa bujqësia dhe sektorë të tjerë prodhues, si industria, tekstilet etj po vuajnë ndikimin e konjukturave ndërkombëtare dhe faktorëve të brendshëm, eksportet tona po humbasin peshë në tregjet ndërkombëtare, duke sinjalizuar për tkurrje të industrisë prodhuese dhe rrjedhimisht, edhe vendeve të punës.
Të dhënat e fundit të INSTAT tregojnë se në 10 mujorin e parë të këtij viti, eksportet arritën vlerën e 369.8 miliardë lekëve, me rënie 53 miliardë lekë ose 14.3% kundrejt të njëjtës periudhë të një viti më parë.
Për një pjesë të prodhimit “Made in Albania” humbjet kanë qenë edhe më të mëdha.
Rënien më të fortë këtë vit e kanë pësuar grupet “Minerale, lëndë djegëse, energji”, “Tekstile dhe këpucë”, që ndryshe i njohim edhe si fasonët, si dhe “Materiale ndërtimi, metale”.
Por cilat janë arsyet që kanë rrëzuar eksportet shqiptare?
Së pari, është zhvlerësimi i euros, monedhë në të cilën kryhet i gjithë aktiviteti, ndërkohë që shpenzimet këto biznese i kanë në lek.
Paralelisht, eksportuesit shqiptarë po përballen me rritje të ndjeshme të kostove, kryesisht punësimit, si pasojë e mungesës së fuqisë punëtore. Dhe faktori i tretë janë konjuktura aspak e favorshme ndërkombëtare.
