Në zemër të Parkut Natyror Zhangjiajie, provinca Hunan në Kinën jugperëndimore, një atraksion i ri ka fituar famë të madhe: “Shkalla e Qiellit”. Ky atraksion ndërlidh dy shkëmbinj me një urë 168 metra të gjatë, e vendosur në një lartësi mahnitëse prej 1524 metrash mbi nivelin e detit.
Rruga është e përforcuar me doreza çeliku, litarë dhe rripa sigurie, duke mundësuar kalimin në faqet e pjerrëta të shkëmbinjve për ata që kërkojnë adrenalinë. Atraksioni është ndërtuar për të eksploruar terrenin kompleks dhe peizazhin spektakolar të parkut, një zonë e njohur për formacionet e saj unike shkëmbore dhe diversitetin gjeografik.
Një video e publikuar nga He Qian, një pronare e një bujtine aty pranë, tregonte djalin e saj nëntëvjeçar duke qëndruar mbi shkallë me qetësi të pabesueshme, ndërsa ajo vetë filmonte me kujdes. Kjo video u bë virale në rrjetin social Douyin, duke mbledhur qindra mijëra pëlqime dhe komente.
Ura tërheq mbi 1200 vizitorë çdo ditë, me disa prej tyre që përshkruajnë ndjesinë si “të frikshme, por të paharrueshme”. Bileta për të vizituar këtë atraksioni kushton 580 juanë (rreth 75 euro), dhe pjesëmarrësit shoqërohen gjatë gjithë rrugës nga guida të specializuara dhe pajisje sigurie, duke përfshirë helmetat dhe rripat e sigurisë.
Tendenca për aventura ekstreme po përhapet gjithnjë e më shumë në Kinë. Numri i kinezëve që marrin pjesë në sporte në natyrë ka arritur në mbi 400 milionë. Atraksione të tjera të njohura përfshijnë një kafene në buzë të shkëmbit me pamje nga Tajvani dhe një dyqan i varur në faqet e maleve të provincës Hunan.
Pavarësisht guximit që kërkohet, “Shkalla e Qiellit” mbetet një nga eksperiencat më emocionuese për ata që kërkojnë një pamje ndryshe të Kinës nga qielli.
