“Shqipëria 1 euro”, dalin në shitje edhe malet

“Shqipëria 1 euro”. Një nismë që e ka pikënisjen në vitin 2006 e vendosur në fuqi që në kohën e ish-kryeministrit Sali Berisha, e aplikuar më tej edhe në qeverinë Rama, do të gjejë zbatim përsëri. Nga synimi i tokave, terreneve, ndërtesave, magazinave shtetërore etj, radha u ka ardhur maleve, por me një ndryshim.

Këto prona nuk do të jepen më me 1 euro për një afat të caktuar, por shteti heq dorë prej tyre duke i shitur ato. Në projektligjin e hedhur për konsultim nga Ministria e Ekonomisë, “Për Shitjen e Pasurive të Paluajtshme Shtetërore Poseduesve Faktikë Jo pronarë në Zonat me Përparësi Zhvillimin e Ekonomisë Malore” theksohet se qëllimi është zhvillimi i zonave malore.

“Projektligji ka për qëllim, pikërisht konsolidimin e marrëdhënies juridike të pronësisë mbi tokën, në këto zona me përparësi zhvillimin, me qëllim nxitjen dhe tërheqjen e investimeve për zhvillimin e qëndrueshëm të ekonomisë, në ato zona , të cilat për shkak të burimeve natyrore, trashëgimisë së pasur kulturore dhe gamën e gjerë të aktiviteteve në natyrë që ofrojnë konsiderohen si zona të një rëndësie të veçantë me përparësi zhvillimin malor dhe kanë nevojë për mbështetje të posaçme”.

Nisma e vjetër e ‘’100 fshatrave’’ dhe ajo e reja për ‘’paketën e maleve’’ janë objekt i këtij projekt-ligji që ka si synim kryesor investimin e emigrantëve shqiptarë në atdhe.

“Iniciativa për këtë projektligj merret në kuadër të “Programit të integruar për zhvillimin rural – Programi i 100 Fshatrave”, dhe më konkretisht, në kuadër të nismës “Investo në Tokën Tënde – Paketa e Maleve”, e cila synon të ofrojë një qasje alternative për tërheqjen e investimeve direkte dhe orientimin e tyre, për zhvillimin e atyre zonave rajonale/lokale të qeverisjes vendore, të identifikuara si zona me përparësi zhvillimin, që kanë nevojë për përdorimin e mekanizmave të veçantë, për zhvillimin ekonomik”.

Miratimi dhe zbatimi i këtij ligji sipas ministrisë së Ekonomisë do të reduktonte pabarazitë sociale dhe ekonomike midis rajoneve në të gjithë vendin, duke nxitur investimet dhe duke ulur papunësinë.