LIGJET E BIZNESIT
Nga Aurora Sulce, Producente Ekzekutive për Biznesin në A2 CNN
Një ndër burimet kryesore të financimit të ekonomisë dhe krijimit të vendeve të punës janë investimet e huaja. Shumë të dëshiruara për çdo vend dhe kjo është arsyeja që tashmë prej disa vitesh në rajon është hapur gara e ashpër për tërheqjen e investitorëve të huaj.
Por si paraqitet Shqipëria?
Fluksi i investimeve të huaja ka pësuar rritje të vazhdueshme vitet e fundit, duke arritur në rreth 1.5 miliardë euro vitin e kaluar, niveli më i lartë i shënuar vitet e fundit. Ndërkohë që në fund të pjesës së parë të këtij viti, investimet e huaja arritën në 750 milionë euro, duke sinjalizuar se do të mbeten në kufijtë e vitit 2023.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Më tërheqësi është sektori i pasurive të patundshme. Të huajt po blejnë prona në Shqipëri, kryesisht në zonën e bregdetit, të nxitur edhe nga zhvillimi i turizmit. Në pasuritë e patundshme janë orientuar 29% e totalit të fluksit të investimeve të huaja. Në vend të dytë është sistemi financiar dhe ai i sigurimeve me 23%, pasuar nga industria nxjerrëse me 15% të totalit.
Por cili vend dominon investimet e huaja?
Të dhënat tregojnë se Holanda po kryeson investimet e huaja direkte në Shqipëri për të pestin vit radhazi. Dominimi i Holandës në renditjen e investitorëve të huaj lidhet kryesisht me faktin se ky shtet është juridiksion i preferuar për regjistrimin e kompanive offshore, për arsye fiskale, por edhe për çështje të ruajtjes së konfidencialitetit mbi aksionerët. Disa korporata të rëndësishme me aksionerë të huaj në Shqipëri kontrollohen nëpërmjet shoqërive holding, të regjistruar në Holandë. Pas Holandës renditet Zvicra dhe në vend të tretë Kanadaja.
