Inflacioni në rënie, por ushqimet janë shtrenjtuar

Të dhënat e Institutit të Statistikave tregojnë se në shtator inflacioni, treguesi që dëshmon për koston e jetesës në vend zbriti në 1.9%, niveli më i ulët në katër vitet e fundit.

Por kjo nuk ka ndodhur me cmimet e ushqimeve, të cilat rezultojnë të jenë rritur muajin e kaluar. Sipas INSTAT, grupi “Ushqime dhe pije joalkoolike” ka shënuar në shtator një rritje prej 2.9%, më lart se inflacioni I periudhës dhe 0.3% më shumë se muaji gusht. Grupet e tjera të mallrave dhe shërbimeve që ndikojnë në inflacion kanë pësuar rënie.

Ushqimet janë edhe grupi I produkteve me ndikimin më të madh në shpenzimet që bëjnë familjet shqiptare. Të dhënat e pak ditëve më parë të publikuara nga INSTAT treguan se një familje shqiptare shpenzon mesatarisht 40% të buxhetit mujor për t’u ushqyer. Kjo peshë në vendet e tjera të rajonit shkon maksimumi në 27%, ndërsa në vendet europiane në 13.6%.