LIGJET E BIZNESIT
Shqipëria do të dalë në tregjet ndërkombëtare për të marrë një borxh të ri, me vlerë 600 milionë euro. Bëhet fjalë për emetimin e një eurobondi të ri, i cili po planifikohet të merret nga qeveria nisur edhe nga situata e mirë makroekonomike.
Ministria e Financave ka nisur procedurat për një firme të specializuar në dhënien e këshillave ligjore për emetimin e eurobond-it.
Në garën e shpallur thuhet se ky eurobond që pritet të emetohet në muajit e parë të vitit 2025, do të përdoret për të mbuluar nevojat qeverisë, si për financimin e borxhit të kaluar, ashtu edhe për shpenzime të tjera e mbështetje buxhetore.
Duke qenë se pas reduktimit të inflacionit bankat qendrore po lehtësojnë politikat e tyre monetare duke ulur normat bazë të interesit, borxhi mund të merret me një kosto më të ulët se ai i emetuar vjet, por ekspertët gjykojnë se situata në tregjet e huaja ende nuk është e stabilizuar.
Kjo do të ishte hera e shtatë që nga viti 2010 që vendi del në tregjet e huaja për të marr borxh. Deri më tani vlera e eurobondeve shkon në 3.15 miliardë euro.
Sipas të dhënave nga Ministria e Financave, aktualisht në portofolin e borxhit shtetëror janë 4 eurobonde në vlerën totale prej 2.4 miliardë euro apo rreth 255 miliardë lekë.
