LIGJET E BIZNESIT
Nga Aurora Sulce, Producente Ekzekutive për Biznesin në A2 CNN
Kriza e çmimeve që tronditi botën dhe që ishte pasojë e luftës në Ukrainë, që nisi në shkurt të vitit 2022, la pasoja të konsiderueshme, pavarësisht përpjekjeve të të gjitha qeverive dhe bankave qendrore për të minimizuar efektet. Një situatë nga e cila nuk mund të shpëtonte Shqipëria, si një ekonomi e vogël dhe totalisht e ekspozuar nga ajo që ndodhte në botë, për shkak të varësisë së madhe nga importet.
Por dy ditë më parë, Instituti i Statistikave raportoi se inflacioni, treguesi që mat koston e jetesës në vend, zbriti për herë të parë pas 4 vitesh në 1.9%.
Por a do të thotë kjo se cmimet kanë rënë dhe kriza ka kaluar? Vështirë të parashikohet, kur pasiguritë janë të mëdha. Madje, në Shqipëri teksa inflacioni ka shfaqur shenja të forta rënëse, çmimet e ushqimeve kanë ndjekur një trajektore tjetër. Në shtator, grupi i ushqimeve është rritur me 2.7%, duke qenë 0.8% më i lartë se inflacioni i përgjithshëm dhe me rritje 0.3% çmimeve të ushqimeve në gusht.
Arsyeja kryesore e shtrenjtimit të ushqimeve është varësua shumë e madhe nga importet, në një kohë kur prodhimi vendas po tkurret dhe bujqësia është futur në një cikël të pashmangshëm rënës. Në 8 mujorin e këtij viti, importet u rritën me 3.1% kundrejt të njëjtës periudhë të një viti më parë dhe ushqimet ishin grupi i dytë me ndikimin më të madh, me 1.5%.
Për sa kohë situata e tensionuar vijon në një pjesë të globit, pasiguritë ekzistojnë. Ekspertët ndërkombëtarë vlerësojnë se risqet janë ende të pranishme dhe ato mund të materializohen tek çmimet e ushqimeve; karburanteve; energjisë dhe rritja e normave të interesit.
