Ndërsa inteligjenca artificiale vazhdon të përparojë dhe të ndryshojë tregun e punës, aftësitë e buta (soft skills) – ato aftësi njerëzore që teknologjia nuk mund t’i imitojë plotësisht – po bëhen gjithnjë e më të kërkuara. Pavarësisht zhvillimeve të mëdha teknologjike, studimet tregojnë se aftësitë e lidhura me ndërveprimet njerëzore dhe etikën e punës mbeten thelbësore për suksesin në shumë fusha.
Sipas listës së fundit të LinkedIn për vitin 2024, disa nga aftësitë më të kërkuara nuk kanë të bëjnë me teknologjinë, por me sjelljet dhe aftësitë që lidhen me ndërveprimin dhe organizimin personal. Këto aftësi përfshijnë komunikimin, lidershipin, punën në grup dhe zgjidhjen e problemeve, të cilat zënë pozicionet kryesore në këtë listë. Edhe në një botë ku teknologjia po dominon gjithnjë e më shumë, këto aftësi “të qëndrueshme” mbeten kritike për bizneset.
Një studim i fundit nga ADP, një kompani e shërbimeve menaxheriale, konfirmon këto gjetje. Ata anketuan më shumë se 1,500 biznese për të kuptuar cilat aftësi janë më të rëndësishme gjatë procesit të rekrutimit të kandidatëve të rinj. Për bizneset e vogla dhe të mesme, “kultura e fortë e punës” ishte aftësia më e rëndësishme, me 53% të bizneseve të vogla dhe 40% të bizneseve të mesme që e renditën atë si prioritet. Në bizneset e mëdha, kultura e punës zuri vendin e dytë, me 42%, ndërsa aftësia për të punuar në ekip ishte më e rëndësishmja, me 45%.
Sidoqoftë, ajo që e bën më interesante këtë gjetje është fakti që, sipas të dhënave të ADP, kuktura e fortë e punës është gjithashtu aftësia më e vështirë për t’u gjetur te kandidatët e rinj. Rreth 36% e bizneseve të vogla dhe të mesme dhe 33% e bizneseve të mëdha kanë raportuar se kjo aftësi është më e vështira për t’u gjetur.
Një tjetër aspekt i rëndësishëm është interpretimi i ndryshëm që lidhet me etikën e punës, sidomos kur flasim për gjeneratat më të reja, si gjenerata Z. Disa drejtues biznesesh shprehen se punonjësit e rinj shpesh kanë mungesë të etikës së punës ose janë të vështirë për t’u menaxhuar. Ky perceptim ka bërë që disa punëdhënës të shmangin rekrutimin e kandidatëve të rinj nga kjo gjeneratë.
Përveç etikës së punës, disa aftësi të tjera që janë të vështira për t’u gjetur te kandidatët e rinj përfshijnë: iniciativën personale, mendimin kritik, menaxhimin e kohës, zgjidhjen e problemeve, fleksibilitetin dhe njohuritë specifike të industrisë. Këto aftësi janë jetike për një treg pune që po ndryshon me shpejtësi, dhe bizneset vazhdojnë të përpiqen për t’i gjetur këto cilësi te kandidatët e rinj.
Në fund të fundit, ndërsa teknologjia përparon, aftësitë njerëzore mbeten thelbësore për suksesin e biznesit dhe për ndërtimin e marrëdhënieve të forta në vendin e punës. Për këtë arsye, kandidatët që zhvillojnë këto aftësi të buta kanë një avantazh të madh në tregun e punës./entrepreneur
