Shqipëria mbetet e varfër, qeveria ngre struktura për analizë statistikash dhe adresim

Është në rënie, por varfëria në Shqipëri përsëri mbetet në nivele shqetësuese. Nëse merr më pak se 22 500 lekë, sot je i varfër. Në kushte të tilla, kur vendi ynë renditet i 6-ti në Europë si më i rrezikuar nga varfëria, qeveria ka vendosur të marrë disa hapa që ta zbusin fenomenin.

Për të analizuar treguesit kryesor në dokumentin e politikave të përfshirjes sociale përcaktohet se do të merren në konsideratë mosha, përkatësia etnike, vendndodhja, punësimi, të ardhurat, aftësia e kufizuar, gjinia dhe orientimi seksual: “Synimi i përgjithshëm do të jetë zhvillimi i informacioneve dhe përftimi i njohurive më të thella mbi faktorët që ndikojnë te varfëria, përjashtimi social, deprivimi material, rreziku për të qenë i varfër.”

Por, ka të tjerë elementë që, sipas sociologëve, duhen shtuar për një analizim më të plotë të nivelit të jetesës së qytetarëve.
Sociologia Eris Dhamo tha: “Merret në konsideratë vlera e kalorive që i duhet një individi për të jetuar, një individ duhet të jetojë në familje merren parasysh kushtet e banesës, jetesa na kërkon një televizor me ngjyra, një lavatriçe… Nuk mjaftohemi me kaq, sipas treguesve europianë një familje duhet të ketë të përfshirë dhe një palë pushime.”

Matja e nivelit të varfërisë në mënyrë të përgjithshme bëhet përmes disa anketave nga Instituti i Statistikave. Tashmë do të shtohen edhe një Grup Ndërinstitucional i Statistikave të Përfshirjes Sociale për të siguruar qëndrueshmërinë në përkufizime dhe në përdorimin e treguesve, si dhe një një Strukturë Burimore Teknike për analizën e varfërisë. Në fund të çdo viti do të ketë edhe një raport vjetor për përfshirjen sociale në kryeqytet dhe në rrethe: “Ndërhyrje trajnuese me fokus të qartë, të cilat do të forcojnë kapacitetet e administratës publike në nivel qendror dhe vendor, për të garantuar se përfshirja sociale është pjesë përbërëse e politikave në nivel kombëtar dhe vendor.”

“Vërtet ne themi që nuk kemi diferenca në paga në sektorin publik. Kur shohim treguesit e punësimit shikojmë që gra punësohen në ato sektorë që janë më pak të paguara”, shprehet sociologia Dhamo.

Këto janë politika me të cilat vendi synon të përafrohet me Bashkimin Europian dhe zbatimi i asaj çfarë është shkruar në letër do të ndikonte në zbutjen e varfërisë ne vend./A2 CNN