Më pak nxënës do të ulen në bankat e shkollës këtë të hënë. Të dhënat e Institutit të Statistikave tregojnë se për vitin akademik 2023-2024, janë regjistruar në arsimin 9-vjeçar 258.072 nxënës, 54,7 % në arsimin fillor dhe 45,3 % në ciklin e lartë të arsimit bazë. Krahasuar me vitin shkollor 2022-23, marrin pjesë në arsimin 9-vjeçar 3,4 % më pak nxënës.
Emigracioni i vazhdueshëm dhe plakja e popullsisë janë dy arsyet kryesore e tkurrjes së numrit të nxënësve në shkolla. Një dukuri që vihet re edhe në ciklet e tjera të studimit. Paralelisht, vihet re edhe një rënie e interesit për arsimin, jo vetëm nga të rinjtë, por edhe nga të diplomuarit në këtë degë, ose thënë ndryshe, mësuesit e ardhshëm.
INSTAT konstaton se numri i mësuesve në arsimin 9 vjeçar është 24.109, ndër të cilët 78,0 % janë gra. Raporti nxënës për një mësues në arsimin fillor publik është 15,1 dhe në atë privat është 15,2. Ndërsa në ciklin e lartë të arsimit 9 vjeçar, raporti nxënës për një mësues në arsimin publik është 7,9 dhe në atë privat 8,0.
Arsimi konsiderohet baza për zhvillimin e shoqërisë dhe ekonomisë. Kjo pasi ndikon në produktivitet dhe në rritjen e konkurrueshmërisë, vecanërisht në një botë globale që po bëhet gjithmonë e më shumë digjitale dhe teknologjike.
