Ndërsa pensionet janë rikthyer në fokus të diskutimeve politike, me premtimin e kryeministrit Rama për rritjen e tyre, të dhënat tregojnë se jo vetëm bizneset, por edhe institucionet shtetërore nuk paguajnë kontributet e sigurimeve shoqërore për punonjësit. Kjo do të thotë se ata rrezikohen që kur të arrijnë moshën e pensionit, të mos përfitojnë të ardhurat që u takojnë me ligj.
Sipas Ministrisë së Financave, nga më shumë se 136 miliardë lekë të planifikuara për t’u mbledhur deri në korrik, nga sigurimet shoqërore u arkëtuan më pak se 80 miliardë lekë. Kjo shumë është sa 59 për qind e planit.
Ndërkohë vetëm gjatë vitit të shkuar, detyrimet e tyre ndaj Institutit të Sigurimeve Shoqërore u zgjeruan me 200 milionë lekë. Nga 20,5 miliardë lekë në vitin 2022, gropa e krijuar në skemën e pensioneve nga mos-pagesa e sigurimeve arriti në 22,5 miliardë lekë fund-vitin e shkuar.
Ekspertë të ekonomisë vlerësojnë se politika e rritjes së pagave nga qeveria në thelb të saj ka pikërisht derdhjen e më shumë kontributeve, për të mos lejuar skemën të shkojë në kolaps. Por, zgjerimi i detyrimeve ndaj saj nga bizneset dhe institucionet cenon jo vetëm stabilitetin fiskal aktualisht të sistemit të pensioneve, por po bëhet shkak për një problem më të madh social në të ardhmen.
