Rama premton për 2025: Baret e restorantet pa plazhe private, përfitojnë vetëm hotelet

Sezonin e ri në podacast, Kryeministri e nisi me premtime për vitin e ardhshëm për bregdetin shqiptar. Sipas tij, në 2025 do të ketë më shumë hapësira publike dhe do të kufizohet e drejta për të pasur plazhe private. Nga kjo nisëm e qeverisë para zgjedhjeve do të preken baret dhe restorantet të cilat nuk do të përfitojnë më, si dhe do të rregullohet numri i shezloneve edhe për hotelet.

“Vitin tjetër ne do të ndryshojmë sistemin dhe nuk do të lejojmë më shezlone përveç se për ata që kanë hotele”, tha Rama. “Dhe jo vetëm përveç se ata që kanë hotele, nuk mund të jepen më leje plazhesh për të ardhur një individ, person juridik a fizik, për të thënë dua këtë plazhin këtu, do vë një “beach bar” dhe do vë shezlone. Jo! Mund të bësh një “beach bar” por nuk ke për të vënë shezlone. Mund të bësh një restorant por nuk ke për të vënë shezlone”.

Rama paralajmëroi edhe kufizime për hotelet. “Ti nuk mund të kesh një hotel me 40 dhoma dhe të vesh 200 shezlone dhe të marrësh popull aty dhe t’i detyrosh të paguajnë. Jo! Ti do vësh shezlone për aq sa ke kapacitetin, natyrisht domethënë jo një për dhomë dhe do lësh distanca të tjera nga shezloni në shezlon”, tha kryeministri.

Një zgjidhje e ofroi edhe për ata që kanë bllokuar vijën bregdetare. “Ti nuk mund të çosh shezlonet deri te bregu i ujit. Do të krijojmë një fashë, atë që kemi thënë, të hapësirës publike, do ta krijojmë në vijën e ujit hapësirën publike. Do të duhet, dhe do ta fillojmë me bashkitë, që bashkitë të marrin hapësira dhe të vendosin çadra dhe aty ku është e arsyeshme edhe shezlone, por me një çmim tavan. Lezha është model, se është polic ai, kryetari i Bashkisë së Lezhës. E them me shaka, por shakaja është gjysma e të vërtetës… Të kenë mundësi njerëzit të vijnë me çadrat e tyre dhe të paguajnë një shumë minimale, sepse duhet për të pastruar ajo shumë. Duhet çliruar komplet ajo mushkëri e detit dhe e rërës nga gjithë ato insekte që e sulmuan rëndë këtë vit”, tha Rama.

🎙️ Podcast “Money Hour” | Fast News Economy

🏛️ LIGJET E BIZNESIT–Ligji në Kohë Reale për Biznesin Modern