Pagesat e profesionistëve të lirë? Ministri i Financave tregon nëse do të kthehen paratë

Rreth 10 mijë profesionistë të lirë kanë paguar këstet e tatimit të thjeshtuar mbi fitimin, përpara se Gjykata Kushtetuese të shfuqizonte nenet e ligjit për tatimin mbi të ardhurat, që i taksonte ata me një normë nga 15-23 për qind. Kanë kaluar më shumë se dy muaj nga vendimi I Kushtetueses dhe ende nuk dihet nëse profesionistët e lirë do të marrin mbrapsht pagesat që kanë bërë.

Ministri i ri i Financave, Petrit Malaj në daljen e parë publike para medias ka zbardhur masat që po merren për zgjidhjen e kësaj ceshtje.

“Ne si minsitri e Financave jemi duke përgatitur një kërkesë gjykatës Kushtetuese që do i kërkojmë çfarë do të bëhet me fondet që kemi mbledhur. Derisa të kemi bërë këtë nuk mund të marrim asnjë vendim”, është shprehur ministri.

Ministri preku edhe çështjen e rivlerësimit të pronave, ku norma tatimore e hedhur për diskutim është 5 %, por ende nuk ka një vendim final.

Kryefinanciari Malaj ka bërë të ditur edhe ndërhyrjet që do të bëhen në skemën e pensioneve, e cila ka probleme, që reflektohen në finale me pensione të ulëta.

“Sfidë personale do të jetë adresimi i çështjeve të pensioneve, një çështje që na përket të gjithëve, pa ngjyrim majtas apo djathtas. Po punojmë edhe me Ministrinë e Ekonomisë, Kulturës dhe Inovacionit për të gjithë skemën e pensioneve, e cila nuk është në ditët më të mira të saj. Na duhet një skemë vizibile që siguron pensione më të larta për njerëzit”, u shpreh ministri.