Shtohet numri i të huajve që marrin leje qëdrimi në Shqipëri. Sipas të dhënave të Institutit të Statistikave, në fund të vitit 2023, numri i të huajve me leje qëndrimi në vendin tonë rezultoi 21.460 banorë, duke pësuar rritje me 18,2 %, krahasuar me vitin 2022. Numri i të huajve me leje qëndrimi dominohet nga meshkujt me 63,8 %, kundrejt femrave me 36,2 %.
Numri i aplikimeve për leje qëndrimi në Shqipëri në vitin 2023 ishte 12.430 aplikime, duke shënuar një rritje me 22,7 %, krahasuar me vitin 2022. Të huajt me origjinë nga Kosova, Italia dhe Turqia përbëjnë numrin më të madh të të huajve me leje qëndrimi në Shqipëri në vitin 2023, respektivisht me 3.712, 3.375 dhe 1.693 banorë.
Të huajt me origjinë nga Evropa rezultojnë 15.223 banorë në vitin 2023 dhe përbëjnë 70,9 % të të huajve gjithsej, kundrejt 73,3 % që përbënin në 2022. Punësimi është arsyeja kryesore e lejeve të qëndrimit të të huajve në Shqipëri në 2023 me 48,3 %. Në vitin 2023 janë evidentuar 6.630 të huaj të parregullt në territorin e vendit, ku pjesën më të madhe të tyre, rreth 44,0 %, e zënë të huajt me origjinë nga Afganistani dhe Siria.
Të huajt në Shqipëri
Gjatë vitit 2023, numri i të huajve me leje qëndrimi përbëhet nga 13.691 meshkuj dhe 7.769 femra. Grup-mosha dominante e të huajve me leje qëndrimi është 30-39 vjeç, e cila përbën 22,5 % të të huajve gjithsej me leje qëndrimi.
Numri i aplikimeve për leje qëndrimi në Shqipëri, në vitin 2023 ishte 12.430 aplikime, duke shënuar një rritje me 22,7 %, krahasuar me vitin 2022. Aplikimet sipas vendit të origjinës nga Kosova dhe Italia përbëjnë 28,5 % të aplikimeve gjithsej në 2023.
Të huajt në Shqipëri sipas vendit të origjinës
Në vitin 2023, të huajt me origjinë nga Kosova janë 3.712 banorë, duke shënuar një rritje me 31,2 %, krahasuar me 2022, ndërsa të huajt me leje qëndrimi në Shqipëri me origjinë nga Italia janë 3.375 banorë, duke shënuar një rritje me 14,5 %, krahasuar me 2022.
Të huajt në Shqipëri sipas arsyes
Në vitin 2023 të huajt me leje qëndrimi për arsye punësimi zënë 48,3 % të të huajve gjithsej, ndjekur nga arsyet për bashkim familjar me 22,2 %, arsyet të tjera me 13,3 %, arsyet për qëllime humanitare me 12,4 % dhe arsyet për studime 3,7 %.
