LIGJET E BIZNESIT
Asnjë bashki nuk do të marrë më pak para se një vit më parë. Ministri i Shtetit për Pushtetin Vendor, Arbi Mazniku ka shpjeguar pas mbledhjes së qeverisë, ku u miratua rritja e pagave për administratën vendore se po punohet për një mënyrë të re të shpërndarjes së grantit.
“Kemi ngritur grup pune për rishikimin e formulës shpërndarjen e grantit dhe në buxhetin e do të ketë një formulë të axhustuar të grantit, ku do të ketë edhe tregues të performancës. Asnjë bashki nuk do të marrë më pak para se një vit më parë. Mënyra si do të shpërndahen paratë do të jetë një mënyrë e re, por asnjë bashki nuk do të marrë më pak para se një vit më parë”.
Duke folur për vendimet e këshillit të ministrave Mazniku theksoi se u përmbyll rritja e pagave të të gjitha bashkive në nivele të unifikuara.
“Nëpërmjet një vendimi të Këshillit të Ministrave konkluduam një proces të rëndësishëm që nisi me dialogun vendor dhe u dakordësua me bashkitë, që ka të bëjë me pagat e pushtetit vendor. Por jo vetëm me pagat, është reformë që merret edhe me ristrukturimin e bashkive në 3 grupime të mëdha; një me planifikimin e politikave, një me funksionet që bashkia kryen vetë dhe një që bën ato funksione që bashkia bën vetë apo t’i kontraktojë. Riklasifikuam nivelet e pagave nga një skemë që i ndante në 5 grupime; në nivele pagash të unifikuara të të gjitha bashkive duke i dhënë mundësi që një personi që është jurist, arkitekt apo ekonomist në të gjitha bashkitë merr paga të ngjashme në të gjitha bashkitë”.
Sipas tij kjo do t’u japë mundësi mundësi bashkive që të rekrutojë në mënyrë konkurruese profesionistë.
“Rritja e pagave të të gjitha bashkive në nivele të unifikuara të pagave, unifikojmë mënyrën e llogaritjes së pagave dhe vjetërsisë së punonjësve dhe në administratën shtetërore. Këto janë disa nga ndryshimet kryesore të bashkive. Do t’u japë mundësi bashkive të rekrutojë në mënyrë konkurruese profesionistë, në mënyrë efikase dhe eficente dhe ky është një ndër hapat e rëndësishëm”.
