Nga Filipinet dhe Indonezia, eksperimenti për të sjellë punëtorë nga jashtë

Eksperimenti për të sjellë punëtorë nga jashtë do të vazhdojë. Shqipëria synon të marrë punëtorë nga Indonezia dhe Filipinet. Lajmin e pohoi kryeministri Rama gjatë hapjes së konferencës së Ambasadorëve “Tirana Diplo 2024”.

“Me Indonezinë kemi vendosur një marrëdhënie që ka një potencial shumë të madh dhe mbi të gjitha që ka një interes shumë të madh për ne, ashtu si dhe marrëdhëniet me Filipinet”, tha të hënën kryeministri Rama gjatë fjalës së tij para diplomatëve shqiptarë.

Eksperimenti për të sjellë punëtorë nga jashtë do të vazhdojë. Shqipëria synon të marrë punëtorë nga Indonezia dhe Filipinet, duk ndjekur linjën e vendeve të Bashkimit Europian që sot janë duke trokitur në këto shtete për forca të reja pune.

“Fillimisht me punonjësit nga Filipinet jemi njohur nga familjet e pasura që i sillnin prej andej për nevoja të familjet apo babysitter”, thotë Ergesta Stërmasi, eksperte e tregut të punës.

Kryesisht për sektorin fason dhe atë të turizmit, janë rreth 40 mijë të huaj që pritet të vijnë në Shqipëri në muajt në vijim. Kjo bazuar edhe te një deklaratë e bërë tre muaj më parë nga drejtori i Përgjithshëm i Punësimit në Ministrinë e Ekonomisë, Kulturës dhe Inovacionit, Albin Gega. “Në këto vite eksperiment kanë treguar që kanë rendiment dhe nuk e shohin Shqipërinë vetëm si vend transit drejt Perëndimit”, thotë Stërmasi.

Të dhënat tregojnë se vitin e shkuar u pajisën me leje pune 9 mijë e 825 shtetas të huaj, me një rritje prej 18.3 për qind në raport 2022. Që nga viti 2017 janë më shumë se 37 mijë të huaj që kanë marrë leje për të punuar në Shqipëri. (grafik 1) Kjo me qëllim mbushjen e boshllëkut të krijuar nga emigracioni. Sipas të dhënave nga Agjencia Kombëtare e Punësimit dhe Aftësive, pjesa më e madhe e punonjësve të huaj që kanë ardhur në Shqipëri deri më tani janë nga Turqia, Egjipti, Filipinet, India, Kina apo Ukraina.

“Kjo është një zgjidhje afatshkurtër. Është një eksperiment, rezultat e të cilit janë treguar edhe më herët. Vëmendja jonë duhet të jetë te të rinjtë në vend. Ka edhe shumë kosto për sjelljen e tyre”, thotë Stërmasi.

Të dhënat nga Instituti i Statistikave tregojnë se ndërkohë janë 74 mijë e 730 shqiptarë të regjistruar si të papunë pranë zyrave të punës. Pjesa më e madhe janë me arsim të mesëm, por janë edhe afro 7 mijë të tjerë me arsim të lartë. Nga ana tjetër janë mbi 32 mijë punëkërkues të regjistruar që trajtohen me ndihmë ekonomike./A2 CNN