Mbetjet e rrezikshme, Balluku: Porti i Durrësit nuk ka asnjë lidhje

Ministrja e Infrastrukturës dhe Energjisë, Belinda Balluku, i është përgjigjur interesit të gazetarëve për eksportin e mbetjeve të rrezikshme nga porti i Durrësit. Ajo hedh poshtë përfshirjen e Autoritetit Portual të Durrësit në këtë çështje dhe përgjegjësinë ia faturon koncensionarit europian që operon në këtë port. Sipas saj Autoriteti Portual i Durrësit me koncensionarin që ka kryer këto transporte janë dy etnitete konkurrente

“Kjo çështje ka marrë përmasa ndërkombëtare dhe dua t’i bëj thirrje medias e opinionit që të tregohen të kujdesshëm tek analizojnë këtë këtë çështje që përveçse delikate është dhe shumë të komplikuar nga ana juridike e proceduriale. Të gjitha analizat që kam dëgjuar afektojnë imazhin e Shqipërisë dhe do të ishte e udhës që të prisnim vendimet që do të dalin nga të gjitha proceset që kanë nisur sa i përket kësaj çështjeje. Çështja ka marrë emrin porti i Durrësit, por Autoriteti Portual i Durrësit dhe çështja e mbetjeve të rrezikshme janë dy gjëra të ndryshme, përshihet MIE, Autoriteti Portual i Durrësit apo ministri të tjera”.

Balluku tha se transporti i mbetjeve të rrezikshme ka filluar në vitin ’98 dhe për të ka një protokoll të veçantë.

“Transporti i mbetjeve të rrezikshme ka filluar në vitin ’98. Ka një protokoll të mirëfilltë për të cilin Ministria e Mjedisit dhe Turizmit e ka bërë me dije të gjithë mediave, nuk është asgjë e re ka edhe tranzitim dhe eksport të mbetjeve të rrezikshëm që janë të koduara në bazë të kodeve europiane të transportit të këtyre mbetjeve. Ka qenë një procedurë normale deri ditën kur ka marrë këtë përmasë mediatike nga anëtarët e konventës së Bazelit”.

Ajo theksoi se “Autoriteti Portual i Durrësit nuk ka asnjë lidhje me këtë proces duke qenë se të gjithë jeni në dijeni, që janë proceduar nga një prej koncensionarëve europianë që operojnë në portin e Durrësit, Autoriteti Portual i Durrësit me koncensionarin që ka kryer këto transporte janë dy etnitete konkurrente që ta keni të qartë dhe ta shikoni më sy tjetër”.

Sipas Ballukut, kjo çështje proceduriale nuk duhet të kthehet në një çështje kombëtare dhe ndërkombëtare.

“Të gjitha institucionet ligjzbatuese janë angazhuar që në fillim dhe do të kërkoja që secili prej jush t’i jepte kohën e duhur drejtësisë dhe pastaj të flasim për analiza të sakta dhe mos ta kthejmë këtë çështje proceduriale në një çështje kombëtare dhe ndërkombëtare”.