Kërkesat në rritje për birrë, vecanërisht në periudhën e verës po plotësohen nga importi. Të dhënat zyrtare të Drejtorisë së Përgjithshme të Doganave tregojnë se në 7 mujorin e këtij viti, importi I birrës ka shënuar nivelin më të lartë të 5 viteve të fundit. Për këtë periudhë janë importuar rreth 32 mijë ton birrë, me rritje progresive që prej vitit 2020.
Vetëm në korrik janë importuar 8.974 ton birrë, sasia më e lartë e regjistruar edhe në raport me muajt e tjerë të këtij vitit. Tregues i qartë se rritja e kërkesave për birrë gjatë verës, nga vendasit dhe turistët e huaj është plotësuar kryesisht me import dhe më pak me prodhim vendas.
Ky i fundit ndodhet në vështirësi kundrejt birrës së importit. Pasi dyfishimi i akcizës së birrës në 710 lekë për hektolitër nga 1 janari i vitit të kaluar duket se ka favorizuar më shumë importin dhe ka dhënë efekte negative për fabrikat e birrës në vend, të cilat u detyruan të rrisnin çmimin e produktit final. Nga vendosja e kësaj takse, pasojat për industrinë kanë qenë të rënda dhe janë reflektuar gjithashtu në ulje prodhimi me 20 për qind dhe shkurtim të fuqisë punëtore.
Për shkak të çmimit të lartë nga kostove të shtrenjtuara, birra shqiptare po humbet konkurrueshmërinë, ndërsa sasia e blerë nga jashtë po rritet me ritme të larta.
Përfaqësuesit e industrisë kanë kërkuar nga qeveria që të marrë masa për korrigjimin e këtyre ndryshimeve në mënyrë që të mos dëmtohen prodhimi vendas.
