Grupi hungarez 4iG është prezent në tregjet e Shqipërisë dhe Malit të Zi në fushën e telekomunikacionit përmes markës ONE.
Budapest, Hungari – 4iG Group, kompania hungareze, lider rajonal në fushën e IT dhe telekomunikacionit, po eksploron mundësitë për të hyrë në tregun e telekomunikacionit në Maqedoninë e Veriut.
Kryetari i grupit, Gellért Jaszai, u takua me Zëvendëskryeministrin, njëherazi edhe Ministër i Transportit të Maqedonisë së Veriut, Aleksandar Nikoloski, në kryeqytetin hungarez për të diskutuar bashkëpunimin e mundshëm.
4iG synon të vërë në dispozicion ekspertizën dhe suksesin që gëzon në rajon për të ofruar shërbime mobile dhe fikse në Maqedoninë e Veriut. Kompania e konsideron këtë iniciativë si një hap strategjik për praninë e saj në Ballkanin Perëndimor, pas zgjerimit të fundit në Mal të Zi dhe Shqipëri.
“Ne besojmë se historiku i suksesshëm i grupit 4iG në industrinë e telekomunikacionit, kombinuar me ekspertizën rajonale, mund të aplikohet në mënyrë tepër efektive edhe në tregun maqedonas. Kjo nismë e propozuar premton përfitime të rëndësishme për të dyja palët dhe mund të jetë veçanërisht e dobishme për qytetarët e Maqedonisë, pasi si vendi ynë ashtu edhe Grupi 4iG ndajnë një vizion të përbashkët për një shoqëri të lidhur dhe të avancuar digjitale.” – shtoi Aleksandar Nikoloski, Zëvendëskryeministër dhe Ministër i Transportit të Maqedonisë së Veriut.
Gjatë takimit zyrtar, të dyja palët theksuan rëndësinë e zhvillimit të infrastrukturës digjitale për progresin ekonomik dhe social, teksa Kryetari 4iG Group, theksoi përkushtimin e 4iG për zhvillimin kësaj infrastrukture dhe shprehu interesin për të investuar në teknologjitë më të avancuara për të zgjeruar dhe forcuar rrjetin në të gjithë Maqedoninë e Veriut. Kjo nismë synon të përmirësojë përvojën e klientit, të krijojë vende pune dhe të stimulojë rritjen ekonomike.
“Ne jemi të etur të kontribuojmë në sektorin e telekomunikacionit të Maqedonisë së Veriut dhe të nxisim ndryshime pozitive përmes teknologjisë. Për t’i shkuar më tej ambicies sonë për të hyrë në tregun e telekomunikacionit në këtë vend, në javët e ardhshme do të fillojmë të punojmë me Qeverinë për të zyrtarizuar angazhimin tonë dhe për të detajuar më tutje këtë marrëdhënie.” – tha Gellért Jászai, Kryetar i 4iG Group, pas diskutimit me Zëvendëskryeministrin.
Zgjerimi i Grupit 4iG në Ballkanin Perëndimor është pjesë e strategjisë së tij për rritjen e mëtejshme në rajon. Vlen të përmendet se një ndër investimet më të rëndësishme për Ballkanin Perendimor, është edhe zhvillimi i projektit të kabllove nënujore për transmetimin e të dhënave me kapacitet të lartë, midis Shqipërisë dhe Egjiptit, projekt nga i cili pritet të përfitojë jo vetëm Shqipëria, por edhe Maqedonia e Veriut si edhe më gjerë.
