Nga pasioni kreativ, te inovacioni teknologjik: Si Inteligjenca Artificiale po pevolucionon botën e artizanatit të bizhuterive
Si u lind pasioni për dizajnimin e bizhuterive dhe cila është historia pas Sette Gioielli?
Sette Gioielli është një punishte bizhuterish e themeluar në vitin 1981 nga Mauro Sette. Ne specializohemi në unaza shumëngjyrëshe me forma origjinale, të njohura si unaza kokteje. Për ne, bizhuteria është një formë arti. Ajo na lejon të shprehim kreativitetin tonë dhe t’u ofrojmë klientëve tanë pjesë unike. Çdo unazë ka një histori të veçantë, e formuar nga guri kryesor ose nga rasti i veçantë për të cilin është krijuar.
Çfarë inovacionesh sjell Sette Gioielli në dizajnin dhe prodhimin e bizhuterive?
Ne gjithmonë kemi investuar shumë në kërkime dhe zhvillim. Mbi 15 vjet më parë, filluam të përdorim printera 3D për të krijuar bizhuteritë tona me precizion maksimal. Megjithatë, përparimi i vërtetë ndodhi dy vjet më parë kur u bëmë të parët në Itali që integruam inteligjencën artificiale në punishten tonë. Falë kësaj teknologjie, e cila rrit kreativitetin e artizanëve tanë, tani mund të gjenerojmë shpejt imazhe realiste të bizhuterive bazuar në specifikimet e klientit. Në këtë mënyrë, ne fillojmë prodhimin vetëm kur klienti është vërtet i kënaqur me imazhin e gjeneruar, duke eliminuar rrezikun e keqkuptimeve ose gabimeve në vlerësime.
A është kjo një teknologji që e keni prezantuar tashmë në Shqipëri? Cilat janë perspektivat?
Ne e kemi prezantuar këtë teknologji në Universitetin Polis të Tiranës gjatë Javës së Dizajnit. Studentët patën mundësinë të dizajnojnë me inteligjencë artificiale, të përdorin softuerë 3D për modelim, dhe të printojnë prototipa të personalizuar të bizhuterive në rrëshirë. Aftësitë në programet e inteligjencës artificiale do të jenë thelbësore në tregun e punës së së nesërmes. Ne besojmë se kjo teknologji duhet të udhëhiqet nga inteligjenca artizanale. Jemi mirënjohës Ambasadës Italiane në Shqipëri për ftesën në këtë rast.
Si do të jetë e ardhmja e bashkëpunimeve tuaja në Shqipëri dhe cila është përshtypja juaj për tregun shqiptar?
Tregu shqiptar po përjeton një rritje të konsiderueshme. Ne patëm mundësinë të bashkëpunonim me kolegë në Tiranë dhe të admirojmë pasionin dhe mjeshtërinë e tyre. Bizhuteria është shumë e dëshiruar nga banorët e kryeqytetit, dhe produktet italiane të punuara me dorë, si tonat, janë të mirëpritura. Ne jemi të bindur që ka potencial të madh për bashkëpunime me dyqane lokale dhe planifikojmë të kthehemi në Tiranë në të ardhmen e afërt./AE
