LIGJET E BIZNESIT
Në gjysmën e parë të vitit kanë dalë nga vendi 600 mijë shqiptarë më shumë se vitin e shkuar. Nga pak më shumë se 3 milionë në harkun e muajve janar-qershor 2023, këtë vit kanë dalë nga pikat kufitare mbi 3.6 milionë qytetarë. Pjesa dërrmuese e tyre kanë fluturuar e udhëtuar jashtë vendit më shumë se një herë, kryesisht për të kaluar pushimet.
“Është shumë e vërtetë që ka më shumë shqiptarë që po ikin jashtë. Pse? Sepse oferta turistike që po vjen nga jashtë është më e lirë nga ajo që hotelet tona ofrojnë”, deklaron kreu i Unionit Turistik, Rrahman Kasa.
Çmimet e shtrenjta si arsye për të kaluar jashtë pushimet, pohohen edhe nga vetë qytetarë që kanë kaluar disa ditë në vijën bregdetare të jugut të vendit.
“Është shumë e vështirë. Unë vetë jam nga Vlora. Nëse nuk do të kisha shtëpinë time, nuk mendoj se do mundesha. Dhoma këtë vit është shtrenjtuar me 20 euro. Me 10 euro ishte rritur çmimi i shezlongut.”
Po ku po shkojnë shqiptarët këtë verë?
“Po shkojnë në Turqi, në Siçili,. Kjo pasi tashmë ka dy avionë në javë. Veriu i Greqisë, Halkidiki është gjithashtu shumë e preferuar”, shton Kasa.
Duke marrë të mirëqena shifrat e raportuara nga INSTAT, në gjysmën e parë të vitit kanë hyrë në vend turistë të huaj gati po aq sa shqiptarë kanë dalë. Në janar-qershor numërohen 4.5 milionë turistë të huaj, 870 mijë më shumë se shqiptarë të dalë.
