LIGJET E BIZNESIT
Gjyshërit suedezë kanë të drejtë të kërkojnë pagesë për të mbajtur dhe për t’u kujdesur për nipërit e mbesat e tyre, pasi vendi i famshëm për politikën e tij pioniere të kujdesit ndaj fëmijëve u lejon prindërve të transferojnë të drejtën e lejes prindërore me pagesë te njerëzit përtej familjes së ngushtë të fëmijës.
Ligji i ri i Suedisë, i cili hyri në fuqi të hënën, u lejon prindërve të transferojnë deri në 90 ditë të pushimit të tyre të paguar tek personat e tjerë në rastin e familjeve me një prind dhe 45 ditë në rastin e një çifti prindërish. Gjyshërit e konsiderojnë këtë si një “ide të shkëlqyer”.
Nuk është hera e parë që Suedia është pioniere e shërbimeve sociale. Qytetarët suedezë paguajnë disa nga taksat më të larta në botë, por kompensohen nga shteti duke u ofruar atyre kujdes mjekësor, arsim falas deri në arsimin e lartë dhe përfitime bujare të papunësisë. Vendi nordik, i cili ka një popullsi prej mbi 10 milionë banorësh, ka gjithashtu ligjet më bujare të pushimit prindëror në fuqi, duke lejuar një total prej 480 ditësh leje me pagesë për çdo fëmijë, të cilat duhet të ndahen nga të dy prindërit.
Gjatë vitit të parë të fëmijës, prindërit mund të marrin 30 ditë leje prindërore në të njëjtën kohë për t’u kujdesur për fëmijën e tyre së bashku. Politika e Suedisë është në kontrast të fortë me atë të SHBA-së dhe përgjithësisht me ato pak vende perëndimore që nuk parashikojnë leje prindërore me pagesë dhe leje lindjeje me pagesë. Dhe vetëm punonjësit federalë në rreth një duzinë shtete të SHBA-së kanë të drejtë për leje prindërore me pagesë.
Hulumtimet kanë treguar se programet e lejes prindërore priren t’i bëjnë familjet më të shëndetshme pas lindjes së një fëmije dhe të përfitojnë si prindërit ashtu edhe fëmijët në planin afatgjatë. Politikat e reja të miratuara nga Suedia do të përmirësojnë ekuilibrin midis punës dhe jetës personale dhe në veçanti për familjet me një prind me përfitimin përfundimtar për vendin.
