Polarizimi i shoqërisë shqiptare ka arritur nivele të skajshme. Ndërsa gati 42 për qind e jetojnë më të ardhura pranë kufirit të varfërisë, depozitat në banka kanë arritur nivelet më të larta të shënuara ndonjëherë në tre dekada.
Në fund të qershorit, stoku i tyre arriti në mbi 1.3 trilionë lekë, duke shënuar një rritje prej 57.7 miliardë lekë ose 4.6 për qind kudrejt të njëjtës periudhë të një viti më parë.
Të dhënat nga Banka Qendrore tregojnë se me gjithë zhvlerësimin, euro është valuta kryesore në të cilën shqiptarët mbajnë kursimet e tyre. Depozitat në euro shënuan në fund të qershorit, vlerën e mbi 7.5 miliardë euro nga më pak se 6.7 miliardë qershorin e një viti më parë.
Të dhënat nga Banka e Shqipërisë tregojnë gjithashtu, se në fund të 6-mujorit të parë të këtij viti, stoku i depozitave në monedhën kombëtare ishte pak më shumë se 591 miliardë lekë. Në raport me qershorin e vitit 2023, kursimet në lekë rezultojnë të jenë zgjeruar me 7.8 për qind.
