Rivlerësimi i pronave do të bëhet me 5%. Rama: Në fuqi 1 vit, hera e fundit që ndodh

Rivlerësimi i pasurive të patundshme do të bëhet me 5% nga 15% që ëhstë aktualisht. Lajmi është dhënë nga kryeministri Edi Rama gkjatë një takimi me kryetarët e bashkive. Ai deklaroi se nisma hyn në fuqi në shtator dhe do të jetë e vlefshme për një vit, pra deri në fund të shtatorit të vitit 2025. Po në shtator do të nisë puna për referencat e reja sa i përket rivlerësimit të pasurive.Sipas kryeministrit, kjo është mundësia e fundit për ata që duan të rivlerësojnë pasurinë me mim të ulët, pasi ka kosto për buxhetin.

“Ne kemi bërë këtë proces dy herë. Nuk është proces që bëhet rregullisht, sepse në thelb kjo është një amnisti. Por ka një kosto për buxhetin e shtetit, pasi në momentin që bëhet rivlerësimi, atëherë shmanget tatimi 15% mbi shitjet në vijim.

Duke qenë se e para rivlerësimi është bërë bazuar në faktin që nuk ishin referencat e reja, sot me referencat mund t’u japim të drejtë qytetarëve të kenë një shans të fundit. Është e rëndësishme të konkludojmë edhe punën e nisur për referencat e reja për qytetet e reja dhe jo vetëm për Tiranën. Sot vija bregdetare nuk është me çmime reference nga e shkuara.

Ne e kemi nisur punën, dhe do konkludojmë brenda 40-45 ditëve të ardhshme, do rindërtojmë një proces që rivlerësim të jetë i hapur 1 vit. Fund shtatori me fund shtatori. Rivlerësimi i parë është bërë me 1%, i dyti me 3% dhe i fundit do jetë me 5%.

Të gjithë ju dhe bashkitë ku ka kërkesë të komunikoni me qytetarët që kjo është e fundit, nuk do ndodhi më. Mos e lënë këtë shans sepse do kenë barrë më të madhe më vonë.

Buxheti i shtetit humbet një sasi të konsiderueshme por nga intereson formalizimi i pasurisë në territor. Dhe qytetarët përfitojnë drejtpërdrejt dhe kjo është pozitive. Për këtë duhet të ndërmerrni një proces komunikimi”, tha kryeministri.