Një në tre shqiptarë në të zezë, raporti i PNUD: Pjesa më e madhe e ekonomisë informale

Në prag të zgjedhjeve Parlamentare të vitit 2021, një në pesë lekë që qarkulluan në Shqipëri erdhën nga burime të paligjshme. Një raport i Organizatës së Kombeve të Bashkuara për Zhvillim, tregon se nga pak më shumë se 1.7 trilionë lekë që ekonomia prodhoi në total gjatë vitit 2020, rreth 329 miliardë apo 20 për qind e totalit ishin nga burime të kriminale.

“Arsyet kryesore të mbizotërimit të flukseve të parave nga aktivitete të paligjshme financiare shkojnë lidhen me mungesën e kapaciteteve të institucioneve, integritetit të tyre dhe përgatitjes për parandalimin e tyre. Ka pasur një lloj përparimi në drejtim të ngritjes së mekanizmave ligjorë dhe rregullatorë për të parandaluar flukset e parave të paligjshme, por mungojnë të dhënat që tregojnë shkallën e parave nga aktivitetet kriminale”, raporti i UNDP.

Edhe më e lartë rezulton sipas analizave të Organizatës së Kombeve të Bashkuara për Zhvillim shkalla e ekonomisë informale në Shqipëri, që llogaritet sa 27 për qind e totalit. Përkthyer në vlerë monetare, gjatë vitit 2022, rreth 445 miliardë lekë u prodhuan nga burime pa panjohura.

“Ekonomia e errët në Shqipëri është e madhe dhe aktiviteti ekonomik informal llogaritet të përbëjë rreth 27% të Prodhimit të Brendshëm Bruto me një të tretën e punonjësve që punojnë “në të zezë”. Në përgjithësi, merr jetë nga një mjedis institucional dhe rregullator i dobët. Informaliteti i përhapur dëmton konkurrencën, pengon alokimin efikas të burimeve shtetërore dhe private, dhe redukton të ardhurat tatimore dhe financimin mbrojtjes sociale”, raporti i UNDP.

Në raportin e titulluar “Vlerësimi i Financës së Zhvillimit në Shqipëri”, UNDP tregon edhe mbi ato që Shqipëria humbet nga flukset e parave të paligjshme apo informale.

“Flukset e paligjshme financiare përbëjnë një sfidë të rëndësishme për Shqipërinë, veçanërisht në termat e efektit gërryes në burimet financiare private, integrimin e tyre në sistemin financiar, lidhjen me ekonominë e madhe informale dhe minimin e shtetit, demokracisë dhe institucioneve publike.”, raporti i UNDP.

Flukset e parave të paligjshme apo nga burime të panjohura janë një fenomen i diktuar edhe nga raporte të institucioneve ndërkombëtare si Fondi Monetar Ndërkombëtar apo Banka Botërore./A2 CNN