Autostrada Thumanë-Kashar është e hapur për qarkullim. Vepra infrastrukturore 21 kilometër e gjatë, pjesë e “Korridorit Blu”, është e para e Kategorisë “A” në Shqipëri, duke hedhur kështu një “gur themeli” drejt një standardi të ri.
Autostrada përmbush të gjitha kriteret e Bashkimit Europian, ku shpejtësia e lëvizjes është 130 kilometër në orë.
“Kjo rrugë është një vend ku të gjithë ata që duan ta prekin me syrin e imagjinatës se çfarë është “Shqipëria 2030” mund ta shohin sepse brenda kësaj periudhe e gjithë rruga nga lart në Muriqan e deri në Vlorë do të jetë kështu. Ky është “Korridori Blu””, u shpreh në inaugurim kryeministri Edi Rama.
Vepra infrastrukturore, që nis nga Thumana e që lidhet me autostradën Tiranë-Durrës, është një investim tërësisht privat, i kompanisë “Gener 2”, e cila pas 35 vitesh do i dorëzohet shtetit.
“Është e rëndësishme të themi që bashkë me këtë rrugë janë ndërtuar edhe rrugët dytësore, të cilat janë të disponueshme jo vetëm për lidhur komunitet me këtë autostradë, por nga ana tjetër për t’i dhënë zgjedhje çdo drejtuesi automjeti që do të vendosë të kalojë me pagesë në këtë autostradë të Kategorisë A, pjesë e Korridorit Blu ose të zgjedhë rrugët dytësore, të cilat do të jenë pa pagesë”, tha ministrja Balluku.
Me nga tre korsi për secilin kah lëvizje, njëra e dedikuar për emergjencat, 14 nënkalime e 12 ura, Thumanë-Kashar i shërben sa qytetarëve shqiptarë aq edhe turistëve të huaj.
“Është një rrugë që i shërben patjetër komunitetit, por po të kemi parasysh flukset e shtuara të turistëve i shërben absolutisht turizmit. Edhe për pasojë komunitetit që me hotelet, agroturimet e bujtinat që ka në zonën e veriut do të furiznozohet më shpejt më mirë dhe do të shëtojnë nga pritjet e gjata”, tha ministrja Mirela Kumbaro.
Autostrada Thumanë-Kashar është segmenti i parë i ndërtuar nga pesë të tillë që përbëjnë “Korridorin Blu”, ndryshe Adriatiko-Jonian. Aktualisht janë lidhur kontratat për Kashar-Thumanë, Thumanë-Milot dhe Lekaj-Fier. Së afërmi, pritet hapja e garës edhe për Milot-Balldren e më pas Balldren-Muriqan.
