LIGJET E BIZNESIT
Konsumi i mallrave të luksit, si cigare, kafe, pije alkoolike dhe karburante është rritur ndjeshëm këtë vit. Kjo jo vetëm prej shqiptarëve, por edhe nga turistët e huaj. Të dhënat nga Drejtoria e Përgjithshme të Doganave tregojnë se në 6 mujorin e parë të këtij viti, u zhdoganuan 13 mijë tonë më shumë karburante, 2900 ton birrë, 101 ton kafe dhe 95 ton më shumë cigare. Ekspertët shpjegojnë se po ndikon ecuria më e mirë e ekonomisë, por edhe zhvlerësimi i euros, monedhë në të cilën blihen këto produkte jashtë vendit.
“Vazhdimi i periudhës inflacioniste, kjo ndikon në vlerësimin e produkteve që importohen por dhe taksën. Ne kemi rritje në sasi të mallrave të akcizës dhe kjo i dedikohet ekonomisë që po rikap ritmin që humbi gjatë pandemisë. Konsumi i produkteve më shumë ndikohet edhe nga zhvlerësimi i euros. Cmimi i produkteve që vijnë nga jashtë janë më të lira dhe kanë shtuar sasinë,” shprehet Pano Soko, ekspert ekonomie.
Rritja e importit të mallrave të akcizës ka shtuar të ardhurat doganore. Drejtoria e Përgjithshme e doganave arkëtoi në 6 muajt e parë të vitit në total 110 miliardë lekë, 7 miliardë më shumë se janar-qershor 2023. Me këtë rezultat ky institucion realizoi 0.2 % më shumë se të ardhurat e planifikuara doganore për janar-qershor 2024.
