Kur të konkurron shteti! Përveç pagave, rritet numri i të punësuarve

Nga Aurora Sulçe, Producente Ekzekutive për Biznesin në A2 CNN

Nga 1 korriku ka hyrë në fuqi rritja e pagave për 135 mijë të punësuar në administratën publike. Paga mesatare në shtet shkon kështu në rreth 900 euro, sipas deklaratave të vetë qeverisë. Një rritje që imponon dhe mbi të gjitha, konkurron fort privatin.

Të dhënat tregojnë se paga mesatare bruto në shtet arriti në fund të tremujorit të parë të këtij viti në rreth 85 mijë lekë në muaj, me një rritje prej 21% në dy vitet e fundit. Ndërsa paga mesatare bruto në sektorin privat arriti në tremujorin e parë të këtij viti në mbi 68 mijë lekë, me një rritje prej rreth 19% në dy vite. Diferenca mes pagës në shtet dhe asaj në privat përllogaritet në mbi 16 mijë lekë në favor të pagës në administratën publike. Por vlen të theksohet se paga e deklaruar në privat merret me rezerva, duke pasur parasysh nivelin e lartë të informalitetit.

Duke qëndruar tek e dhëna zyrtare, sektori publik po e konkurron atë privat jo vetëm me paga, por edhe në njerëz. Kjo pasi numri i atyre që punojnë në shtet është rritur në mënyrë të pandalshme vitet e fundit, pavarësisht objektivit të qeverisë për “Shqipërinë Dixhitale”, ose thënë ndryshe ofrimin e shërbimeve online.

Numri i të punësuarve në sektorin publik ka kapërcyer aktualisht mbi 184 mijë, duke shënuar një rritje prej 14 mijë personash në 5 vitet e fundit. Numri i të punësuarve në shtet është rritur veçanërisht përpara periudhave zgjedhore, duk u përdorur si element elektoral nga të gjitha qeveritë.

Me rritjen e pagave për administratën, rriten tashmë pritshmritë për punën dhe cilësinë e punës që ajo duhet të kryejë.

Ajo që pritet tashmë është rritja e eficencës, produktivitetit dhe ulja e korrupsionit. Veçanërisht korrupsioni konsiderohet një ndër problemet kryesore për biznesin, pasi përkthehet në kosto të fshehtë për të.