Duke i cilësuar “ambasadorët “ më të mirë në tregun e punës, por edhe duke pasur në fokus zhvillimet e karrierës së tyre, Universiteti Mesdhetar i Shqipërisë organizoi një takim ku u bënë bashkë rrjeti i studentëve Alumni, përfaqësues të institucioneve shtetërore, komunitetit të biznesit, drejtues e pedagogë të UMSH.
Një takim i mbushur me shkëmbim eksperiencash, mundësi të reja për punësim dhe plot ide për të integruar edhe më mirë të gjithë ata të rinj që zgjedhin ofertën akademike dhe partnerët strategjik të Universitetit Mesdhetar të Shqipërisë, me synimin : Punësimin e shpejtë dhe të sigurtë të të diplomuarve. Në këtë takim morën pjesë, Arbjan Mazniku, Ministër i Shtetit për Pushtetin Vendor, Eridana Cano, Drejtoreshë e Agjencisë për Dialog dhe Bashkëqeverisje, Aurela Velo, Drejtoreshë e Pergjithshme e Thesarit të Shtetit, Enkela Dudushi, Drejtoreshe e Departamentit të Administratës Publike, Behar Gjoni përfaqësues i FED Invest, përfaqësues të bizneseve, dhjetra ish studentë të punësuar në administratë dhe sipërmarrje private që kanë përfunduar studimet në Universitetin Mesdhetar të Shqipërisë.
“Shumë nga ish-studentët tanë janë aktualisht të angazhuar në pozicione të rëndësishme në institucionet publike, duke kontribuar në zhvillimin e sektorit publik të vendit tonë. Po ashtu, një numër i konsiderueshëm i tyre janë punësuar në kompani private, ku ata sjellin njohuritë dhe aftësitë e fituara gjatë studimeve universitare për të përmirësuar operacionet dhe për të nxitur inovacionin.
Ky takim ka për qëllim pikërisht forcimin e mëtejshëm të këtij bashkëpunimi mes Universitetit institucionve dhe ish studentëve tanë”, u shpreh Presidenti i Universitetit Mesdhetar, Akademik, Anastas Angjeli. Ministri i Shtetit dhe Pushetit Vendor, Arbian Mazniku theksoi se data e antarësimit të Shqipërisë në Bashkimin Europian nuk është më një datë hipotetike por një e ardhme e afërt.
“Që Shqipëria të bëhet një vend anëtar i BE, ka nevojë për profesionistë të rinj të cilët punojnë me të njëjtat standarde dhe ritme të këtij Unioni dhe vetëm nëpërmjet këtyre kapitaleve njerëzore vendi do të mund të zhvillohet më tej dhe të përthithë më shumë fonde”, tha Ministri. Të ftuarit e tjerë vunë theksin në rëndësinë që ka mbështetja dhe kualifikimi i të rinjve për më shumë integrim në tregun e punës si dhe sollën eksperiencat e tyre.
