Abuzimi me çmimet në jug, Rama: Vetëvrasje, vlonjatët do të bien në gropën e gjoksit të vet

Pakënaqësitë e qytetarëve për çmimet e shtrenjtave gjatë sezonit turistik, nga hotelet te restorantet dhe shezlonget, krahasuar me një vit më parë, kanë zënë vend edhe në veshin e qeverisë në Tiranë. Në pamundësi për të ndërhyrë në treg, Kryeministri Rama kërkoi ndihmën e kryebashkiakëve të Vlorës dhe Sarandës që të komunikojnë drejtpërdrejtë me operatorët për t’i paralajmëruar mbi pasojat negative të abuzimit me çmimet.

“Është shumë e rëndësishme të flitet e t’u thuhet që është jo vetëm e padrejtë, por kjo është strategjikisht vetëvrasje, për ata vetë”, tha Rama.

I bindur se vlonjatët nuk do ta vënë ujin në zjarr për këtë paralajmërim, Edi Rama tentoi prekjen në sedër, përmes batutave. “Dhe natyrisht vlonjatët janë molla e këtij sherri. Në gjoksin e vlonjatëve është hapur dhe është bërë një gropë ku do bien vetë këta që i ngrenë ato çmime në atë farë feje”, tha Rama.

Përveç abuzimit me çmimet, një tjetër faktor që po tenton të godasë turizmin shqiptar sipas kryeministrit Rama janë sulmet kibernetike me llogari false që përcjellin pamje dhe informacione të rreme.

“Shumë e ulët për të thënë që shqiptarët e Kosovës e kanë braktisur Shqipërinë, ndërkohë që fakti është se nga janari deri në qershor, janë 1,7 milionë hyrje të qytetarëve të Kosovës, ose 25% më shumëse vjet”, tha kryeministri.

Rama i bëri këto komente në një takim me drejtuesit e bashkive të majta e të djathta, ku ra në sy mungesa e kryebashkiakut të Tiranës Erion Veliaj. E njëjta gjë ka ndodhur më herët në një tjetër takim të ngjashëm të kryeministrit me krerët e pushtetit vendor.