LIGJET E BIZNESIT
Në ceremoninë e prezantimit të platformës për turizmin veror, kryeministri Edi Rama bëri një preznatim të të gjitha projekteve infrastrukturore në funksion të turizmit. Kreu i qeverisë deklaroi se punimet në aeroportin e Vlorës do të përfundojnë brenda këtij viti, ndërsa pritet të jetë operacional në sezonin e ardhshëm turistik. Në fund të këtij muaji do të hapet gara për ndërtimin e aksit Milot-Balldren dhe më pas Balldren-Muriqan për lidhje me Malin e Zi.
Këto projekte dhe të tjera, që do të dorëzohen, do ta kthejnë Shqipërinë në qendrën turistike të rajonit, deklaroi kryeministri Edi Rama nga promovimi i Kalendarit Kombëtar Turistik nëpërmjet aplikacionit TEA.
“Kemi një sezon të ri që hapet me disa vepra të mëdha të infrastrukturës që u vihet në dispozicion udhëtarëve dhe turistëve duke filluar nga Tuneli i Llogorasë, një ide e vjetër, një zotim legjendar i të gjitha forcave politike në të gjitha fushatat i cili këtë sezon do të jetë i kalueshëm për ata që do të shkojnë në jug apo që do të vijnë nga jugu duke vazhduar me rrugën Orikum-Dukat që zbulon një tjetër pjesë të panjohur.
Aeroporti i Vlorës sipas të gjitha gjasave do të përfundojë punimet brenda këtij viti. Do të kalojë në periudhën e testit dhe certifikimeve në 6-mujorin e vitit të ardhshëm. Do të jetë operacional në sezonin ardhshëm turistik me një operator, që është aeroporti i Mynihut. Do të hapte gara për aeroportin e Gjirokastrës”, ka deklaruar Rama.
Kreu i qeverisë bëri të ditur gjithashtu, se po vijon puna për ndërtimin e portit të Durrësit.
