Presim me ankth fitoren me birrë importi në dorë

Shquhemi për patriotizmin e lartë shqiptar, por në këtë ngjarje sportive europiane do të mbetet vetëm një ndjenjë, ndërsa të gjithë do të presim me ankth rezultatin e çdo ndeshjeje të kombëtares kuqezi.

Ngjarjet e rëndësishme sportive botërore dhe europiane shfrytëzohen nga vendet për forcimin e ekonomisë dhe forcimin e markës vendase. Gjerësisht mbizotëron konsumi i pijeve alkoolike dhe kryesisht i birrës. Por, çfarë ndodh në Shqipëri? Zinxhiri i promovimit dhe nxitjes nuk funksionon, sipas prodhuesve vendas të birrës. Ata konstatojnë në nisje të Kampionatit Europian se po u jepet prioritet produkteve të importit. Në “Fanzone”-t e krijuara dedikuar kampionatit, këtë vit produkti shqiptar nuk do të shfaqet, pasi këto vende janë zënë vetëm nga birrat e huaja.

Jo vetëm mbizotërimi i produkteve të importit, por edhe vendosja e tarifave të larta për të shitur në këto “Fanzone”, i ka detyruar prodhuesit vendas të mos marrin pjesë.

Përballë një situate ku në kryeqytet nuk shet dot dhe prodhimi i importit ka zënë pjesën kryesore, sipërmarrësit shqiptarë po gjejnë zgjidhje në qytetet tjera. Xhim Begeja, tregon se prodhimin që ka po detyrohet ta transportojë në Shkodër për ta shitur.

Vetëm në 4 muajt e parë të vitit, Shqipëria importoi 12,9 milionë litra birrë, 3,4 milionë litra më shumë se e njëjta periudhë e një viti më parë. Por, në raste eventesh sportive ky import rritet edhe më tej. Nga ana tjetër, përveç luftës me mallrat e importit, prodhuesit vendas rendisin si vështirësi dhe vendosjen e dyfshimit të akcizës për këtë produkt që nga janari 2023.

Seanca e parë në Gjykatën Kushtetuese u zhvillua më 16 Maj dhe një tjetër për dëgjimin e konkluzioneve më 28 Maj. Ndërsa pritet dhënia e vendimit brenda këtij muaji./A2 CNN